LAIP em long mekim driman na karim kaikai bilong ol dispela driman. Driman bilong Malinsin Alo em i laik kamap medikol dokta bihain taim. Dispela yangpela man husat i gat 22 krismas long Ralomanda viles bilong Kagua-Erave distrik long Saunten Hailens provins we ol University ov Visayas long Filipins i  bin kisim em long go stadi Bachelor ov Medicine na Surgery neks yia.

Kosbai ran long faivpela yia na Alo bai peim K30,000. “Long nau mi no gat dispela kain mani bikos mi stap long plantesin we hatwok long wokim skul fi mani tasol mi i gat bilip olsem God bai mekim isi rot bilong mi long go stadi. “Dispela em laip taim sans mi les long lusim dispela sans bikos prais bilong edukesen long Filipins em orait,” Alo i tok. Laip bilong Alo i kamap long wanpela hatwok rot na ekspiriens insait long plantesin eria. Bilong ol yangpela pikinini husat i gro long plantesin envairomen na wokim skul fi mani long kisim edukesen em meja histori bilong ol. Laip i no inap balens tasol sampela taim hat rot i save bringim gutpela kaikai bilong laip na mekim pipel strong. Dispela kain rot i bin mekim Alo sanap strong namel long ol arapela plantesin pikinini taim em painim hevi strong long skruim driman bilong em long edukesen. “Long yangpela taim bilong em, mi bin driman long kamap wanpela medikol dokta. “Mama bilong mi em nes opisa na papa bilong mi em polis opisa. Tasol ol driman bilong mi i bin abrus taim papa bilong mi bin lusim mama na maritim narapela meri. “Mama tasol i save hatwok long lukautim mi wantaim ol tripela brata na susa bilong mi. Mi namba wan long famili. Dispela em 12 yia nau, laip i no gat papa,” Alo i toktok wantaim aiwara. Alo i bin mekim elementri wan na tu long Imuya Praimeri Skul long hom distrik bilong em tasol bikos long i traibel pait em bin kam bek long Jiwaka long stap wantaim kandere bilong em long Bunum Wo kopi plantesin we ol WR Kapenta i ranim. Em i bin trensfea na go het long skul long gret 3-8 long Giramben Praimeri Skul long Not Waghi ilektoret. As tingting bilong Alo em long painim fridom long laip na dispela em bai kam long edukesen tasol. Dispela hangre bilong edukesen long kamap wanpela dokta bihaintaim i bin draivim Alo long wok strong na em bin go yet long gret 9 long Waghi Valley Sekenderi skul long 2017. Em i bin orait na pasim gret 10 na go het long gret 11 na sindaun long gret 12 eksem long dispela skul las yia. Ol i bin selektim em long go stadi long Gaulim Tisa Koles long Is Nu Briten tasol em bin les long dispela ofa bikos em no driman bilong em long kamap tisa. Long dispela yia Alo i bin bungim wanpela misineri bilong Sauten Hailans husat i karim aut awenes bilong ovasis skolasip long Eriku Lae na em bin bihainim em go long opis long Kamkumung na baim K100 aplikesen fi, pulapim pinis na bihain long wanpela mun em kisim tok orait leta long go stadi. Alo i bin kirap nogut long laip bilong em taim em bin kisim leta bilong University ov Visayas PNG sumatin plesmen kodineta Solostine Lee Yavu i bin go givim em long Lae. “Taim mi lukim dispela leta aiwara bilong mi pundaun olsem kain sans long stadi ovasis kamap long laip bilong mi. “Mi i no gat toktok long mekim bikos dispela em stat bilong driman wok bilong mi long kamap sejon wanpela de. “Mi tok tenkyu long Yunvesiti bilong Visayas na ol PNG sumatin plesmen kodineta long selektim mi,” Alo i tok.

Hoffman Gulgarye i raitim