MAF em i wanpela gutpela pren bilong Oksapmin Sekenderi skul long Tekin na dispela skul i winim  13 krismas nau.

Ol studen bilong dispela skul i save kisim gutpela mak tru long eksam na ol i stap namel long ol top studen bilong kantri. Long planti yia i go pinis, i no gat haiskul long dispela hap na bihain long ol studen i pinis long praimeri skul, ol i save lusim ples na go long haiskul long ol taun olsem Wewak na Aitape. Ol studen i liklik tumas long taim ol i lusim ples na go longwe tru long haiskul olsem na planti bilong ol i painim taim stret. Na famili bilong ol long Oksapmin Veli i save bungim hevi bilong skul fi na ol i no save sapos pikinini i stap gut o no gat.

Ol dispela hevi i mekim na ol pipel i askim long wanpela haiskul i kamap long ples bilong ol we ol pikinini i ken pinisim gret 9 na 10 na long taim ol i bikpela, bai isi long go long bikpela siti long wokim gret 11 na 12.

Ol lain bilong Oksapmin i bin harim long Green Riva Haiskul em Glenda Giles, wanpela misineri bilong Nu Silan i bin kamapim. Green Riva haiskul em i namba tri haiskul Ms Glenda i kirapim long ol ples i stap longwe tru long kona bilong PNG. Dispela haiskul i bin sanap strong long taim Ms Glenda i harim krai bilong ol lain Tekin na em i lusim na  kam helpim ol.

Long 2007, Oksapmin Haiskul long Tekin i op na ol i skulim ol gret 9 studen long ol haus morata na i gat ol haus slip tu bilong ol studen. Long ol yia bihain Ms Glenda, husat i bin het tisa bilong skul i lainim ol arapela tisa bilong PNG long mekim wok na isi isi em i lusim ol wok long han bilong ol. Em  bin mekim olsem long tupela arapela skul em i bin kirapim long Koroba na Margarima long Hela provins. Em i mekim wok bilong deputi het tisa na nau em i tisa tasol long dispela skul.

Balus i wanpela rot tasol bilong helpim skul

Oksapmin Haiskul long Tekin i bin kamap bikos long sevis na komitmen bilong MAF. Ol balus bilong mipela i save karim ol material bilong wokim haus, kaikai na saplai bilong skul i go long Tekin, ol eksam pepa na ol tisa bikos balus em wanpela rot tasol long bringim sevis i go long dispela eria. Long taim ol studen i pinisim haiskul na i laik go skul long rapela hap, ol i save strong long sevis bilong MAF long kisim ol i go long ol arapela provins.

Dispela haiskul i helpim gut ol pipel. Ol studen i kisim gutpela save na i kamap ol lida insait long komyuniti bilong ol na long kantri.

Long 2014, mi bin laki long go stap long wanpela greduesen bilong dispela skul na mi tingim yet toktok bilong hetboi bilong skul: “Bikpela samting tru yu mekim long mipela em i no kisim save long skul tasol. Yu lainim mipla long kamap ol gutpela manmeri bilong bihain taim. Mipela i kisim gutpela stia na edvais long ol asua mipela  mekim na mipela i lusim dispela ain pasin. Nau ol pasin nogut bilong mipela i senis na bai mipela i kamap ol spesel pipel bilong bihain taim. Yu kamap olsem papamama bilong mipela long ples na i stiaim mipela na i lukautim mipela. Mipela i tok bikpela tenkyu tru.”

Miss Gleda i tisa yet long dispela skul. Namba bilong ol studen i surik i go antap long klostu 300 studen na 15 tisa long dispela yia 2020. Ol i gat gret 9 na 10 na long namba wan taim tru, i gat liklik gret 11 klas we 15 em ol man studen na 9-pela meri studen. Skul i gat gret 11 na bai gat 12 tu olsem na nem i senis na kamap Oksapmin Sekenderi skul.

Skul i stap yet long kempus we ol i bin stat long 2007, tasol ol i tingting long muv i go long nupela kempus we bai gat ol pemanen klasrum na haus bilong ol tisa long ol yia i kam bihain.

Mandy Glass i ratim