Dispela man long poto em Aia ‘A Aua, wanpela bilong ol laspela Fuzzy Wuzzy angel na WWII veteran insait long kantri husat i stap yet long Kaugere, Pot Mosbi wantaim ol famili bilong em.

Mama i karim Aia long 26 Jun, 1920 long liklik ples Ara Aiva long Baimuru distrik bilong Galp Provins. Ol betde rekod pepa bilong em i putim krismas bilong em long mak bilong 101 krismas. Long taim bilong namba tu wol woa em i bin stap soldia wantaim Papuan Infentri Betelien na i bin helpim na pait sait long ol Austrailia long Battle Of Kokoda. Aia i bin wok olsem wanpela polisman stap na i bin 18 krismas tasol taim ol siapan soldia i kam sua long Papua Niugini long 1939. Long dispel taim ol i pait na traim long mekim rot bilong ol long kam long Pot Mosbi na i go pait long Australia. Long yia 1942 taim woa i go kamap bikpela na taim em i lukim ples i wok long bagarap stap em i bihainim planti ol narapela ol yangpela asples man na helpim ol Australia long pait egensim ol Siapan. Na long dispela taim i kam inap nau gavman bilong Australia na PNG i givim medol long luksave long hatwok bilong em lo taim bilong woa tasol i nogat wanpela fainensel sapot olsem pensen long helpim em long ol samting em i nidim.  Ol famili bilong em i laikim olsem gavman bilong PNG i mas givim luksave long sait bilong fainensel sapot tu long dispela laspela fuzzy wuzzy angel na WWII veteran. Aninit long olpela koloniel haus bilong em Aia i serim stori bilong em wanpela taim moa. Namel long ol toktok bilong em, lapun man Aia i tingim bek ol taim nogut long woa na kolim nem bilong ol pren bilong em husat i lus na indai long taim bilong woa na em i wari tru. Ben Moide, Biknem WWII veteran husat i save go pas long ol rememberans de taim em i stap laip em i bin wanpela gutpela poroman bilong Aia tu. Em i serim ol ekspiriens bilong em na tok, “Long taim bilong woa ol Australia soldia i bin gat bikpela rispek tru long mipela, long wanem mipela i save helpim ol soldia wer i kisim bikpela bagarap na karim ol long longpela rot i go long seifti. Taim ples i tudak mipela i save stop na wokim ol liklik haus long slipim sikman, painim wara na kaikai bilong em stretim em gut  na bihain mipela wokabaut gen” Bihain long woa Aiya i go bek long wok bilong em olsem polisman na i sevim gavman ken long 24 yia olgeta. Na taim em i pinis long polis em i go wok gen long dipatmen bilong Woks na Saplai i go inap em pinis long 1967. Aua i laikim olsem stori bilong em long woa i mas go ausait long ol arapela ol lapun husat i bin stap tu long taim bilong WWII long sait bilong Australia na Siapan wantaim na ol i ken bung na gavman i bai lukluk na givim sampela liklik helpim long ol dispela WWII veteran bipo long ol i lusim dispela graun. Em i tok long dispela wei em bai wanbel na kisim bel isi na stap. Aia ‘A Aua em wanpela laspela man namel long ol poroman bilong em we i bin pait long Kokoda husat i stap long Kaugere long Pot Mosbi.

Paul Oeka i raitim