WANPELA strongpela maus man bilong asples lain long Madang distrik, Morris Ban i no amamas long lukim olsem ol lokal mama bilong Madang i no gat gutpela spes long salim ol fres gaden kaikai long  mein maket long Madang taun.

Mista Ban wantaim ol arapela local lida bilong Madang i autim bel hevi bilong ol na i tokaut strong olsem mobeta ol lain bilong Madang Eben LLG i mas lukluk na stretim maket spes na givim ol asples mama bilong Madang gutpela ples long sindaun na salim ol fres kaikai bilong ol. Narapela lokal yut lida Louie Langai Kig i autim belhevi bilong em na i tok watpo ol kamlain i gat gutpela ples long sindaun na salim ol fres kaikai long mein Madang taun maket na ol asples mama bilong Madang i stap ausait. Louie i bin sore tru long lukim ol mama bilong Bugati long Astrolabe Be LLG i sindaun long simen ausait long maket bilding na salim ol fres kaikai bilong ol. Em i bin wokbaut raun long Madang taun maket long Mande na i no wanbel tru long lukim ol asples mama bilong Madang i sindaun long simen ausait long haus maket na salim kaikai bilong ol. “Dispela kain samting mi lukim em i no gutpela na em i lukdaun long mipela ol asples Madang stret,” Louie i tok. Em i bin raun na baim ol frut na i bin go baim kukamba long wanpela asples mama long maket taim WantokNiuspepa i bin bungim em na kisim piksa Ol sekyurit ibilong MULLG husat i lukautim mein Madang taun maket na ol i tok nogat tambu long ol asples mama long go na sindaun insait long haus maket na salim ol kaikai bilong ol. Wanpela sekyuriti bilong longtaim yet long maket  Willie Kanawi i tok planti taim ol asples mama i save kam leit na dispela i save mekim ol i leit long kisim spes long maket. Narapela samting tu em ol ausait lain bilong Hailans i save peim fi long putim ol fres kaikai bilong ol insait long maket eria na ol i save kam long moning taim tru na kisim spes pastaim tru.

James G. Kila i raitim