DIPATMEN bilong Forestri i lonsim kopret plen bilong en long Ogas 3, 2021 long ai bilong Praim Minista, ol Divelopmen Patna, ol Het bilong ol Dipatmen, stekholda na ol ripresentetiv bilong ol papagraun.

Long taim em i mekim toktok bilong em long taim bilong launsing, Siaman bilong Forestri Bod i tok em i amamas tru na tok tenkyu long Praim Minista James Marape long luksave long impotens na ikonomik driman

bilong Forestri Dipatmen na mekim komitmen we Forestri sekta i nidim. “Olsem Siaman bilong Forestri Bod, mi amamas long taim bihain bilong bus bilong PNG. Yumi mas go het long lukautim bus bilong yumi long kamapim namba wan na sastenabol bus bilong taim bihain long PNG na pipel bilong en,” Mista Iduhu i tok. Em i tok moa olsem gutpela menesmen bilong Fores sekta bai sapotim gro bilong ikonomi na strongim gutpela wok namel long

ol bisnis insait long Fores sekta. Forestri Dipatmen i bin launsim kopret plen bilong 2021 i go long 2030 wantaim ol narapela stretajik polisi pepa wok. Olgeta dispela ol i givim i go long han bilong Praim Minista James Marape. “Long PNG, bus em i olsem supamaket bilong yumi. Olsem na yumi mas lukautim gut bus. Bus i mas gat strongpela lo bilong lukautim na banisim. Olsem Minista bilong Fores, mi laik lukim balens i kamap insait long fores sekta, we ol yumi olgeta pipel

bilong PNG wantaim rurel eria i benefit,” Minista Walter Shnaubelt i tok. Em i tok royolti bilong timba i suruk i go long 20 pesen, na dispela peimen bai kamap olgeta mun we Fores indastri yet bai baim i go long ol papagraun na ino PNGFA. Praim Minista James Marape i tok strong olsem nogat foren kampani bai kisim nupela laisens bilong katim diwai long PNG, tasol ol kampani bilong ol papa graun tasol i ken kisim laisens.

Carolyne Ketsimur i raitim