OL KOPRA fama long Karkar ailan long Sumkar distrik bai kisim gutpela helpim long prais sabsidi long kopra ol i salim long Lin Guan Kampani Limited bihain long Madang provinsal gavman i givim K1.5 milien olsem prais sabsidi.

Dispela sabsidi i stat long dispela mun.

Gavana bilong Madang, Peter Yama i givim sek long Lin Guan kampani long Fonde, Julai 2 na i tokaut olsem K750,000 i kamaut long Provinsal Sevis Impruvmen Program (PSIP) fan na narapela KK750,000 i kam long provinsal gavman.

Lin Guan, i papa bilong kampani nau wok long i baim kopra na sevim ol liklik fama long Karkar ailan.

Lin Guan i save kisim helpim i kam long bikpela kopra baia long PNG em Auspan long prosesim ol kopra.

Gavana Yama i tok kopra em i bikpela samting long ol rurel pipel na wan wan ol famili long Karkar ailan.

Mani bilong kopra tasol i save helpim ol long baim skul fi, baim klos na baim medikol fi na tu helpim laip bilong ol.

Em i tok planti famili husat i save kopra long ailan i bungim hevi bilong trenspot.

Mista Yama i tok em i givim dispela K1.5 milien prais sabsidi long sapotim Memba bilong Sumkar, Chris Nangoi long givim moa sapot long helpim ol rurel fama.

Em i amamas tu long Lin Guan Kampani Limited bikos kampani i gat sip i save ran i go kam long Karkar ailan na bringim kopra i go long Madang taun.

Em i tok tu olsem Lin Guan Kampani i helpim gut ol rurel fama long Karkar ailan bikos taim prais i stap olsem K1 long wanpela kilogrem, kampani i save baim long K2 long wanpela kilogrem.

Mista Yama i tok dispela helpim bai lukim ol rurel fama na ol famili long Karkar ailan i ken salim ol kopra na arapela gaden kaikai bilong ol i go stret long baia na kisim gutpela mani.

Yama i givim K1.5 milien prais sabsidi helpim bilong MPG i go long ol Karkar fama long ai bilong Minista bilong Egrikalsa, John Simon na lokal Memba na Minista bilong Koreksenel Sevis, Chris Nangoi.

David Gelagal, wanpela komyuniti lida long ples Liloi long Takiasait i tok sampela bel hevi i bin kamap bihain long provinsal gavman i givim prais sabsidi i go long Lin Guan Kampani.

Em i tok Lin Guan i nupela kampani long Karkar ailan, na i gat ol arapela long-taim egrikalsa kampani long ailan i stap olsem Kulili Estet, husat i sevim ol pipel long samting olsem 100 yia na Biabi Estet, i sevim ol Karkar fama moa long 60 yia tasol gavman i kalapim ol na givim luksave long nupela kampani.

Tasol Gelagal i tok ol olpela kampani i tingting long wokim winmani bilong ol yet na i no givim gutpela prais o kamapim ol insentiv olsem sabsidi praim long helpim ol rurel fama.

James G. Kila i raitim