- COVID-19 i wok long kilim planti moa manmeri long Indonesia na ol saveman i tok klostu bai kamap wankain olsem ol hevi i bin kamap long India.
- Wanpela saintis husat i save long ol kain sik olsem i tok wok bilong dispela banis sut bilong COVID-19 i no kamap bikos gavman bilong Indonesia i no givim stretpela infomesen i go long ol pipel.
- Ol i tok ol toktok bilong gavman i wok long paulim ol pipel.
TUPELA wik i go pinis COVID-19 i bin kilim papa bilong Gusman Suherman.
Mista Suherman i tok papa bilong em i bin paul long kain kain giaman toktok em i wok long harim long COVID-19 long ples bilong em long Bandung, Wes Java.
"Em i bin kisim infomesen long WhatsApp olsem sapos em i go long haus sik, bai ol i givim dispela vairus long en,” Mista Suherman i tok.
Em i tok long taim papa bilong em i kisim dispela kain infomesen em i bin pret long go long haus sik maski em i bin sik nogut tru.
Moa pipel long Indonesia i wok long kisim dispela sik nau na ol dokta i wari olsem dispela sik bai kamapim bikpela hevi olsem i bin kamap long kantri India.
Las wik ol rekot i soim olsem olgeta wik samting oIsem 20,000 pipel i wok long kisim COVID-19.
Long komyuniti bilong Mista Suherman, CIDIV-19 i bin kilim 9-pela manmeri long dispela wik wantaim papa bilong em.
Em i tok bipo em i no ting bai dispela vairus i kilim famili bilong em tasol nau em i luksave olsem ol giaman toktok long sosel midia i wok long stopim ol pipel long banisim ol yet long dispela wik.
"Mi wari olsem dispela kain infomesen bai i paulim tingting bilong ol manmeri na ol i no inap long traim painimaut sapos ol dispela toktok i tru o nogat. Ol i no save husat tru bai i ken tokim olsem sapos stret sapos ol dispela stori i tru o nogat," em i tok.
"Ol i lukim stori long sosel midia na ol i bilip ol giaman toktok."
'Herd stupidity'
Wanpela savemen bilong ol sik long University of Indonesia, Dr Pandu Riono, i tok dispela pasin i kamap nau long Indonesia em i olsem "herd stupidity", ol manmeri harim ol paul toktok na ol i kirap bihainim tasol.
"Indonesia i kamap olsem wanpela kantri bilong 'herd stupidity'. Pasin bilong ol pipel i wok long mekim dispela vairus i wok long senis na kalap hariap tru i go kam long moa pipel," Dr Riono i tok long sosel midia pes bilong em.
Em i tok ol gavman opisa i salim kain kain toksave na i no wokim gutpela disisen na moa pipel long Indonesia i no bihainim ol helt protokol long stap seif. Em i tok planti bilong ol i pret long kisim banis sut bilong COVID-19.
Dr Riono i tokim ABC olsem em i stat long yusim dispela hap tok "herd stupidity" long taim em i lukim ol manmeri i wok long raun i go long famili bilong ol long ol ples longwe long selebretim Eid al-Fitr, bikpela holide bilong Islam.
"Ol i no laik stap long haus na stopim sik long kalap i go i kam. Ol i kirap i go long asples bilong ol na salim stori long sosel midia sapos ol i go gut o sapos ol i bin bungim sampela salens long taim ol i kamap long boda,” em i tok.
"Dispela em i pasin bilong “herd stupidity”, ol i no wari long dispela sik na bikpela kraisis i kamap.”
wantokniuspepa.com