MOUNT Nyiragongo volkeno long Democratic Republic of Congo i karamapim ol haus na bagarapi
ples klostu long Goma siti. Ol pipel i wok long painim ol famili bilong ol em dispela volkeno i bin
karamapim.

Planti tausen manmeri i ranawe lusim Goma siti bihain long Mount Nyiragongo volkeno i
pairap.
 Lava i kapsait long volkeno na ran olsem wara i kam daun na karamapim ol haus na ol
samting i stap long rot bilong en.
 Ol saveman i wari bai volkeno i pairap gen tasol i no gat inap mani long mekim wok bilong
sekap oltaim long dispela volkeno.
Populesen bilong Goma em i samting olsem 2 milien, na long taim volkeno i pairap long las wik
Sarere, lava i ran olsem retpela wara i kam daun long maunten. Ol manmeri i pret na ranawe nabaut
long tai molo i lukim dispela samting i kamap.
Mausman bilong gavman, Patrick Muyaya, i tok 15 pipel i dai. Nainpela i bin dai long trefik eksiden,
foapela i dai long taim ol i laik ranawe long Goma haus kalabus na tupela em paia bilong volkeno i
kilim ol.
Long taim dispela volkeno i paia long 2002, samting olsem 250 i bin dai na 120,000 pipel i lusim haus
bilong ol. Olsem na las wik Sarere long taim volkeno i pairap, samting olsem 5,000 manmeri i ranawe
i go olsem long boda bilong Rwanda.
Volkeno i karamapim 17 ples, tripela helt senta, wanpela praimeri skul na i bagarapim wara paip tu.