Wanpela memba bilong Bogenvil palamen i tok ABG i gat gutpela gavman sistem we i
moa strong winim bilong Papua Niugini na planti ol arapela kantri long Pasifik.

Memba bilong Ioro Konstituensi, Theonila Roka Matbob i tok bikos long dispela, Bogenvil i
mas kisim luksave long Papua Niugini nesenel gavman long larim ol foran gavman o misin i
ken go kamapim opis bilong ol long Bogenvil.
Dispela em i wanpela long ol tingting wanpela teknikel komiti bilong tupela PNG gavman na
ABG i makim long tupela gavman bai toktok long en long narapela Joint Supervisory Body
(JSB) miting bilong tupela.
Wanpela bikpela lain bilong ol Bogenvil ilekted lida na ol opisal i bin go long Pot Mosbi las
wik long redi long holim JSB miting bilong tupela las wik, tasol ol i surikim i go long tupela
wik bihain bikos long ol hevi long sait bilong PNG nesenel politik.
Misis Matbob husat i edukesen minista tu bilong Bogenvil i tok maski em i gat ol lo na oda
isu tu, Bogenvil i bin lukim stabiliti bikos long komiti sistem em i gat insait gavman ol i
kirapim long 2005.
Misis Matbob i tok olsem em i wanbel tu long ol I surukim de bilong dispela JSB miting, long
wanem em i laik long ol i mas toktok tu long sait bilong kain edukesen we Bogenvil i nidim.
Em i tok JSB i mas toktok long ol wok redi long kamapim Bogenvil independens bihainim ol
plen insait long 100-day plen bilong gavman bilong Presiden Ishmael Toroama.

Wokpainim bai kamap long we bilong kisim pis long solwara (FB photo: PNG Agriculture)
Pasin bilong hait na stilim pis bilong solwara em i hat liklik long ol atoriti i stopim
long sampela hap bilong Pasifik. Dispela hevi em ol bikpela sip na long ples tu i
mekim stil pasin long ol solwara.
Planti pipel long PNG tu i no save yusim ol pasin tumbuna long kisim pis na dispela i mekim
namba bilong ol pis long solwara i ken sot sapos ol senis i no kamap.
Wantaim dispela tingting bilong konsevesen, dispela wokbung bai kamap namel long
James Cook yunivesiti long Australia na ol Pasifik kantri long helpim long painim sampela
rot bilong helpim ol pipel.