Wanpela wokbung namel long 6-pela yangpela musik atis bilong Bogenvil na tupela biknem asples pefoma bilong Australia i lukim ol i kamapim wanpela musik album we i kirapim tingting bilong ol pipel long sapotim komyuniti bilong ol.

Minista Morris Opeti, Jake, Michael Dave na Tjupurru wantaim ol lain i danis long tok welkam. Wan Solwara.

WANPELA wokbung namel long 6-pela yangpela musik atis bilong Bogenvil na tupela biknem asples (First Nations) pefoma bilong Australia i karim kaikai nau we wanpela musik album i kamap long kirapim tingting bilong ol pipel long sapotim komyuniti bilong ol.

Dispela album Wan Solwara, em Wantok Musik i outim aut. Ol musik atis Adrian Tjupurrula (Tjupurru) Fabila na pikinini bilong em Jake wantaim Michael Dave, Ruth Maison, Walter Kerevio, Jolista Masu, Robertha Yansi na Milton Garea. Ol arapela kontributa em bes gitaris Richard Mogu, Tsarlayse Iamu na Kawas Band.

Ol i bin rekodim dispela album long Bogenvil long Septemba 2022.

Ol atis i yusim ol tredisenel na nupela musik instramen we i gat ol bembu paip na didjeribone (miksim didjeridu na trombone). Ol lyrics em Morris Opeti MP, Richard Mogu, Tjupurru, Jake na ol arapela musik atis i bin bung na raitim.

Tjupurru na Jake i bilong Djabera Djabera wanpisin long Kimberly, Western Australia. Mama i bin karim Tjupurru long Pot Mosbi na em i gat famili long Sentral Provins na Bogenvil. Olsem na em i laik Jake i mas strong na “karim spia i gohet yet.”

“Mi amamas long lukim ol yanpela pipel bilong Bogenvil i holim strong kalsa bilong ol. Nau mipela i kamapim bris namel long Australia na Bogenvil na mipela i ken strongim dispela pos,” Tjupurru i tok.

Opis bilong Australia Development Assistance long Buka, i kisim sapot bilong pablik diplomesi fands na Bogenvil Yut Inisitiv em Australia i fandim wantaim Atonomus Bogenvil Gavman na Wantok Musik, i bin wokbung long kamapim dispela projek.

PINIS.