Polis fos i no ples bilong ol lain i save kisim drag na salim raun o ol lain i save mekim trabol. Husat ol i mekim dispela pasin bai kisim mekimsave aninit long lo.

Lina Garry i raitim

ASISTEN polis Komisina, Anthony Wagambie Jr i tok polis fos i no ples bilong ol lain save kisim drag na salim raun o ol lain save mekim trabol.

Mista Wagambie Jr i mekim dispela toktok taim ol polis i arestim na sasim tripela polisman husat i wok long kisim drag na salim gen.

Em i tok ol i bin lukim long wanpela video long sosel media ol polisman i kisim ‘methamphetamine’ o drag nogut bilong bagarapim het bilong ol man na save mekim ol man.

“Sapos mi painimaut olsem ol polisman insait long NCD na Sentral Koman i wok long kisim dispela drag, bai mipela arestim dispela polisman na sasim em aninit long ‘Serious Disciplinary Charges’ o lo we Polis yet i save yusim long arestim ol polis.

“Polis fos i no gat spes bilong ol opisa husat i drag na salim tdrag.

“Dispela tripela man husat i kamap ples klia long vidio bai lukim ol ‘Internal Investigation’ Yunit i sasim ol na mekim disisen bilong stap bilong ol insait long polis,” Mista Wagambie Jr i tok.

Em i tok, ol i sasim ol wantaim edministretiv sas bikos taim polis holim ol, ol i no painim wanpela evidens long ol.

Dispela arest i bin kamap long 6 Me long wanpela lods insait long Mosbi.

Mista Wagambie Jr i tok, polis menesmen i kamap wantaim wanpela plen long painimaut ol opisa na rausim ol long fos.

PINIS.