Ol pablik sevan bilong PNG bai gat sans long malolo long krismas taim bipo long ol i statim wok gen long nupela yia long 2023.

Lina Keapu i raitim

DIPATMEN bilong ‘Personnel Management’ o opis we i save lukautim ol pablik sevan, i tokaut long ol de bilong krismas na niu yia holide.

Long wanpela stetmen i kam long opis bilong Sekretari, em i tok taim we olgeta gavman opis bai kisim wanpela wik holide long krismas na niu yia, na ol i mas pasim opis long Fraide Disemba 23, 2022 bihain long belo na op long Jenuari 3, 2023 we olgeta pablik sevan I mas go bek long wok.

Nesenel Ekseketiv Kaunsel i givim toktok long olgeta pablik haussik, polis, ‘Correctional Service’ (CS), Difens Fos na ol arapela pablik opis long no ken stopim wok tasol skelim wok bilong ol yet long wanwan opis bilong ol long was long ol imejensi long krismas na niu yia.

Dispela olgeta em ol lain bai redi long ol imejensi long krismas na niu yia we ol I no inap long kisim ‘overtime’ tasol bai ol i kisim wanpela spesol holide bihain wantaim pe.

Dipatmen bilong Fainens na ‘Immigration & Citizenship’ bai wok yet namel long dispela wan wik holide.

Ol de we ol opis bai pas em olsem:

• Fraide Disemba, 23 - Wok e i go long belo
• Sarere Disemba 24 - Wiken
• Sande Disemba 25 - Krismas De
• Mande Disemba 26 - ‘Boxing De
• Tunde Disemba 27 - Pablik Holide
• Trinde Disemba 28 - Malolo de bilong ol pablik sevan
• Fonde Disemba 29 - Malolo de bilong ol pablik sevan
• Fraide Disemba 30 - Malolo de bilong ol pablik sevan
• Sarere Disemba 31 - Wiken
• Sande Jenuari 1 - Namba wan dei bilong 2023
• Mande Jenuari 2 - Pablik hoiide long makim nupela yia

Olgeta pablik sevan I mas tingim, Trinde Disemba 28, Fonde Disemba 29, na Fraide Disemba 30 em i no ol malolo de na sapos ol I laik wok bai ol i ken sapos no gat ol i no inap kisim pe long dispela ol de.

Olgeta pablik sevan i mas go bek long wok long de ol I makim long en, em Tunde Jenuari 3, 2023.

PINIS.