Polis long Sentral provins i wok long rausim ol mariwana o spak brus diwai long ol ples insait long provins dispela wik bihain long ol i kisim toksave olsem samepla lain i wok long hait na planim ol.

Lina Keapu i raitim

POLIS long Sentral provins i wok long rausim ol mariwana o spak brus diwai long ol ples insait long provins.

Ol i statim dispela wok long las wik taim ol i kisim toksave olsem ol man i wok long planim mariwana long ples namel long gaden kaikai bilong ol.

Polis long Sentral provins i gat bikpela wok long mekim long wanem Sentral provins em klostu long Mosbi we em i isi stret long karim dispela ol simok no gut na ol arapela samting nogut i go insait.

Long Angabanga ples long Kairuku, ol i bin rausim ol diwai mariwana we ol lain i planim i kamap olsem wanpela bikpela gaden.

Taim polis i go insait ol i katim olgeta dispela diwai na karim i kam bungim na kukim.

Ol i no holim wanpela man tasol ol i putim was long dispela eria.

Narapela hap ol polis i go sekim em long Berere ples klostu long Brown River tasol ol lain planim i rausim pinis bipo ol polis i go kamap.

Polis i wokabaut namel long bikbus long painim dispela ol mariwana we ol lain i save hait na planim.

Dispela wok bilong ‘Polis wok wantaim komyuniti’ i helpim ol polis gut tru long wokim wok bilong ol long wanem ol komyuniti long wanwan ples i save wok wantaim polis long daunim lo na oda hevi long ples.

Ol polis opisa long Sentral Provins i save ran long sait long Kairuku i go olsem long Sogeri, na go olsem long Papa Lealea, na long Magi haiwe.

PINIS.