Ol embasi na hai komisin bilong PNG bai kisim helpim long stretim sidaun na wok bilong ol manmeri husat i lukautim ol long ol arapela kantri.

MINISTA bilong Foren Afeas Justin Tkatchenco i tok dispel gavman bai mekim Dipatmen bilong Foren Ares i olsem bipo.

Mista Tkatchenko i bekim toktok bilong ol midia we ol i toktok long ol embasi i sot long mani.

Em i tok, i gat planti hevi long tasol bai em stretim wantaim helpim bilong gavman.

“Wantaim gutpela baset, menesmen na rot bai yumi putim PNG i go bek long ples bilong em long map.

“Mi tok tenkyu long Minista bilong Treseri, Ian Ling-Stuckey long luksave bilong em long ol laik bilong dipatmen, na Praim Minista tu long makim mi olsem Minista.

“Mi stap em bilong klinim olgeta hevi, mekim ol samting na lukim ol dipatmen i kisim mani bilong en na embasi i ken wok,” Mista Tkatchenko i tok.

Mista Tkatchenko i tok, em bai wok na lukim olsem olgeta embasi mas I gat mani long wok long wanem ol i makim kantri bilong yumi long narapela kantri.

“Mi mekim klia pinis olsem bai yumi no inap go bek gen long bipo na mi no inap givim spes long dispela.

“Foren Afeas em i wanpela impoten dipatmen na tu i em pes bilong PNG.

“Taim mi harim stori bilong ol wokman i no kisim pei na ol embasi i bagarap, em i wanpela bikpela sem PNG i kisim.

“Long lukluk bilong mi, bai mi pait olgeta de bilong wik long lukim olsem ol i kisim olgeta mani ol laikim long ranim operesen bilong ol embasi.

Minista Tkatchenko i tok nau yet tripela embasi bai pas long wanem wok bilong ol i no stret.

Em i tok sapos yumi laik rausim ol hai komisin na ol embasi long ol arapela kantri, Nesenel Ekseketiv Kaunsal bai wokim disisen.

“Bai mipela i pasim ol embasi we ol i no mekim wanpela wok na lukluk long opim nupela embasi we PNG i ken kisim gutpela bekim.

PINIS.

“Mi no inap isi long dispela hevi long wanem mi tingim ol lain husat I wok long ol arapela ol kantri.

“Bai mipela I mekim wok painim aut long lukim sapos I em orait long yusim planti mani long ol olgeta embasi.

“Dispela ol lain husat i wok long lukautim ol embasi long liklik taim tasol, bai kam bek long stretim, na bai mipela I skelim wok, na lukim sapos ol i ken wok yet wantaim dipatmen o lusim.

“Bai mipela i lukluk long ol kantri i gat rot bilong ikonomi olsem tred na sekyuriti.

Minista Tkatchenko i tok, em i no isi long stap na wok long narapela kantri we bai yu mas bihainim lo bilong ol.

Em i tok, bai yumi mas lukim olsem ol lain husat I go stap na makim kantri bilong yumi mas I gat save long makim kantri bilong yumi.

“Ol Embaseda, Hai Komisina, na ‘honarary consul’ husat gavman i makim I mas i gat gutpela save long dispela wok na go makim PNG,” Mista Tkatchenko i tok.