PAPUA Niugini i pren bilong olgeta kantri, Minista bilong Helt na HIV, Jelta Wong i tok. Em i tok PNG i no inap long sapotim wanpela kantri na daunim narapela long wok bilong divelopmen.

Australia Nesenel Brodkasting Koporesin (ABC) i tok olsem Wong i mekim dispela tok long strongim tingting bilong Australia sapos Australia i ting PNG i sapotim Saina. Em i mekim dispela tok tu bihainim disisen bilong gavman long tok orait long kisim marasin AstraZeneca veksinesen em Australia i givim na Sinopharm veksinesen bilong Saina. Dispela tupela marasin i banis marasin long manmeri i kisim sik Coronavirus (CVID-19). Long las Sarere Helt Dipatmen i sanapim wanpela hauswin klostu long Vision City long Waigani wantaim helpim

bilong ol opisa bilong Australia na givim AstraZeneca i go long ol lain husat i laik kisim dispela veksinesen. Dispela kain wok tu em ol opisa bilong Helt Dipatmen i kamap long Pot Mosbi Jeneral Haus sik long 3-Mail wantaim helpim bilong ol opisa bilong Saina na givim Sinohpharm veksinesen. “Mipela i tok tenkyu long Australia long givim veksin na mipela i tok tenkyu tu long Saina long givim veksin,” Wong i tok. “Tupela wantaim i save helpim Papua Niugini long planti wok. “Mipela i amamas na i tok tenkyu long tingting na gutpela sapot bilong ol. Wong i tok PNG i independen kantri na i no mekim disisen bihainim tingting bilong narapela. “I no gat politikal presa i kam long wanpela kantri em PNG i pas long em.”