MEMBA bilong Gumine Distrik Nick Kuman i launsim rurel pawa projek long distrik bilong em las wik.

Mista Kuman i givim wokmak long em yet long givim lait long ol pipel bilong em stat long Disemba dispela yia.

Long launsim dispela pawa projek nupela provinsel edministreta bilong Simbu Sebastian Keeto i putim on pawa long Omkolai long Gumine local level gavman.

Mista Kuman i tok namba wan hap bilong dispela wok em long kirapim bek na stretim ol pawa pos na pawa lain stat long Dokor long Kundiawa na i go long Omkolai na long Omkolai i go long Buli, Dirima, Gumine na mul na tanim bek. Namba tu hap bilong wok em long pulim pawa i go long Boromil.

Mani mak bilong dispela projek em K6.7 milien. Insait long dispela mani mak K4.7 milien i kam long Ministri bilong Haia Edukesen, Risets, Saiens na Teknoloji na K2 milien i kam long Gumine Distrik.

Ennio Kuble i raitim