POLIS Komisina na Kontrola bilong PNG COVID-19 Nesenel Pandemik Rispon, David Manning, i givim ol nupela kontrol mesa bihainim wanpela bung wantaim Praim Minista James Marape na ol lida bilong Nesenel Kontrol Senta.

Ol sampela bikpela senis we i kamap em ol pasindia aninit long 5-pela krismas i no nid long kisim test bilong COVID-19 taim ol i laik kam insait long PNG.

Ol pasindia husat i kisim banis sut bilong COVID-19 pinis na i raun long ol kantri we i no stap insait long mak nogut, i mas i stap 7-pela de long kwarentin.

Ol praivet haus sik i ken givim banis sut long ol manmeri na pikinini tasol dispela i mas kamap sapos PHA bilong ol i wanbel long bihainim rikwaimen bilong rekot na ripot na husat i bai givim banis sut em i mas wanpela helt woka.

Mista Manning i tok olgeta sitisen i mas bihainim ol dispela mesa we i stap long daunim COVID-19.

“Long PNG i winim COVID-19 hevi, olgeta i mas wokbung na bihainim ol rikwaimen insait long ol mesa long sait bilong bisnis na sosel, werim mask olgeta taim na ol lo bilong yusim pablik transpot,” Mista Manning i tok.

Em i tok moa olsem em i kisim toksave pinis olsem sampela bisnis i no bihainim ol kontrol mesa na i mekim long laik bilong ol.

“Ol dispela mesa em i klia tru na olgeta inap long save gut. Mi wetim ol provinsal polis komanda long givim sampela daireksen long ol polis long kantri long strongim ol dispela mesa na i no ken larim bagarap i kamap long pablik,” Manning i tok

Rebecca Negere i raitim