WANEM samting i wok long kamap long Not Korea long taim lida bilong kantri, Kim Jong Un i wok long lusim skin?

Las wik taim Kim Jong Un i abrusim ol nius kamera long go long wanpela miting bilong gavman bilong em, ol lain husat i save stadi long em i lukim olsem skin bilong em i lus. Em nau o i stat long askim sapos em i bin sik o sapos pawa bilong em tu i no strong tumas. 

Dispela lida i man bilong laikim ol kain kaikai olsem sis bilong Frans, na i laik dringim cognac na smokim sigaret oltaim, olsem na em i gat bikpela skin tru. Tasol las wik ol i lukim olsem dispela lida i lusim skin olsem na ol i tingting planti na wok long skelim i go i kam.  

Dispela i bin namba wan taim bilong Kim Jong Un i raun long pablik bihain long wanpela mun.  

Ol i lukim tu olsem let bilong $15,500 Swiss hanwas bilong em tu i slek. 

Kim Jong Un em i no wanpela helti man.  

Dr Bong Young-shik, wanpela risets felo long Yonsei University Institute for North Korean Studies, i tok helt bilong Kim Jong Un em i bikpela staming long laip bilong Not Korea.  

"Kim Jong Un i makim kantri na populesen bilong en,” Dr Bong i tok. 

"Olsem na helt bilong em i impoten long wanem samting i kamap long Not Korea."

Kim Jong Un i gat 37 krismas nau na em inap long bosim Not Korea long planti yia tru, wankain olsem papa na tumbuna bilong em.  

Dispela lida husat i man bilong smok na dring planti, i gat planti hevi long bodi bilong em.

Long 2014, Kim Jong Un i bin go hait inap 40 de na i no bin go long impoten palamen miting. Long taim em i kam bek gen, ol i lukim em i holim stik na wokabaut.

Long 2018, taim em i bin bungim lida bilong Saut Korea long boda bilong tupela kantri, ol intenesenel midia i lukim olsem em i wok long sotwin liklik.

Dr Bong i tok long Hanoi Summit wantaim olpela US presiden, Donald Trump in 2019, ol medikol dokta bilong Saut Korea i bin glasim Mista Kim na ol i tok “i luk olsem em bai i no inap winim 52 krismas.”

Na planti tokwin i bin kamap long 2020 long taim em i no bin kamap long ai bilong pablik inap tripea wik.  

Sampe ripot i tok em i bin sik nogut tru, tasol sampela lain i tok em i wok long hait bikos em i pret long kisim COVID-19.

Wanpela liklik mak long han bilong em i mekim sampela lain tok em i bin kisim operesen long lewa bilong em

Na nau, ol saveman bilong Not Korea i tok ating em i lusim skin bikos em i laik holim strong pawa na sampela i tok em i sik olsem na em i lusim skin..

Dr Bong i tok em i no isi long save long helt bilong Kim Jong Un, tasol ol dispela poto i soim olsem em i mas sik.

Ki Jong Un i kamap long miting wantaim ol gavman opisa long toktok long ol hevi COVID-19 pandemik na ol bagarap em tait wara i bin kamapim long ikonomi bilong kantri.

Not Korea i bin pasim boda bilong en, na strongpela tambu ol kantri i putim long en i mekim kantri i kisim bikpela hevi tru long ikonomi bilong en.

Long mun Epril, Kim Jong Un i tokaut olsem kantri biong em i bungim bikpela hevi tru bikos long pandemik na ol bagarap em tait wara i bin kamapim. 

.