SPESEL polis operesen long Madang i holim namba wan saspek long K6 milien mani bilong Manam Risetelmen Atoriti (MRA).

Dispela man Paul Amera bipo i bin provinsal fainens menesa o tresera bilong Madang provins.

Polis i bin holim pasim em na i kisim em i go long Ramu Suga we senia mejistret long Ramu Distrik Kot i bin sasim em na i putim em long rum-gat.

Kot bilong em bai kamap long liklik taim bihain.

Amera i bilong Obura-Wonenara distrik long Isten Hailans provins.

Ol arapela 7-pela Madang pablik sevan em kot i salim i go long Buimo long Lae, Morobe provins long wetim kot bilong ol.

Namel long ol dispela lain em bipo Madang Provinsal edministreta Joe Kunda Bonomane.

Arapela 4-pela em ol wok lain bilong Ramu Divelopmen Atoriti, em bisnis han bilong Madang provinsal gavman,

Narapela nius long Madang long dispela wik i lukim holim wanpela bodi gad bilong Gavana Peter Yama.

Polis i sekim na painimaut olsem em i karim wanpela gan we i no gat laisens.

Asisten Polis Komisina Noten Rijon, Peter Guinness i mekim strongpela tok lukaut olsem ol wantok bilong dispela 8-pela pablik sevan bilong Madang husat polis i holim pasim ol bihain long MRA mani i lus, i no ken mekim pret toktok long polis.

Guinness i bin mekim dispela tok bihain long wanpela famili memba bilong Kundai i tokim  midia long em i givim tok lukaut long polis.

Dispela wantok i tok famili i no amamas na i redi long kamapim sampela samting sapos ol i no muvim dispela lain long Lae i go bek long Madang.

Guiness i tok polis i no pret na i no surik long tok lukaut bilong ol.

Em i tok polis bai holim pasim ol sapos ol i go het long mekim kain tok olsem.

Em i tok sapos ol i gat hevi, ol i mas go long kot na stretim.

Em i tok ol toktok bilong MRA i stap longtaim yet na nau i taim polis i mas stretim.

Guiness i tok em i go pas long polis long Noten Komand na em i ken givim daireksen long ol opisa bilong em long Morobe, Isten Hailans, Madang na Is Sepik.

James G. Kila i raitim