OL Gret 10 sumatin long bilong Papua Niugini bai sindaun long Written Expression Eksam long tumora Fonde 3 Jun, 2021.

Edukesen Minista Jimmy Uguro i laikim olgeta sumatin i mas wokim gut eksam long helpim laip bilong ol long bihain taim.

Em i tok planti taim i gat ol sumatin save giaman na kisim helpim long ol tisa long taim bilong eksam.

 “Save na promosen i no save kam nating. Em i save kam long bikpela hatwok olsem na yupela i mas wok strong long kisim ol,” Uguro i tok.

Em i tok sapos ol i lukim tisa i helpim ol sumatin long raitim eksam em bai ol i rausim tisa long wok na tu ol sumatin husat i spai na raitim eksam bai kisim bikpela sas.

Ol Gret 10 sumatin bai sindaun long ol eksam bilong ol stat long Oktoba 11 i go 15.

Ol Gret 12 sumatin bai sindaun long eksam long Oktoba 18 i go 22.

Ol Gret 8 bai sumatin bai sindaun long eksem long Oktoba 25 i go 28.

Ol lain bilong lukautim olgeta eksam i mas go kamap long deit na taim we Edukesen Dipatmen Mesamen Sevis Divisen i redim long en.

Ol sumatin husat i spai o kisim helpim long nesenel ekseminesen, bai no gat setifiket bilong ol.

Bai no gat mobail fon long eksam rum bilong ol sumatin.

Jacklyn Kimala i raitim