EKSEKETIV Siaman bilong National Gas Corporation Limited (NGCL), Alfred Kaiabe i bin mekim strongpela tok nogat long nupela Nesenel Eneji Polisi (NEP), Ogenik Lo (OL) na Petroleum na Nesenel Eneji Atoriti bil (PNEAB) we gavman i bin lonsim long Ogas 19, 2020.

Long taim em i  mekim toktok bilong em, Mista Kaiabe i tok PM Marape na gavman bilong em na ol arapela stekholda bilong wel na gas indastri i mas skelim gut gen ol dispela nupela bil bikos em i faulim lo i stap pinis long NGCL aninit long Oil na Gas Ekt 1998.

“Dispela propos OL, NEP na PNEAB i wankain tasol wantaim dispela i stap pinis long seksen 75 bilong Wel na Gas Ekt 1998. Em i soim olsem upela i no ridim na save long dispela lo, na long wankain taim dispela i soim olsem i gavman i no gat luksave moa long wok bilong NGCL,” Mista Kaiabe i tok.

Mista Kaiabe husat em i loya na i bin kontribiut long kamapim Wel na Gas Ekt 1998 tok i luk olsem Ligel Divisen bilong Petroleum na Eneji Dipatmen i no kontribiut i go insait long dispela nupela propos bil. Bikos ol bai luksave olsem i gat kain lo i stap pinis.

Em i tok  lo i tok klia olsem NGCL  i stap olsem gas opreta na gas produsa i responsibol long proses bilong gas insait long  PNG na Domestik Maket Obligesen (DMO) bilong en.

“Ol politisen long bipo na nau i bin lusim bihain NGCL long taim ol i mekim PNG LNG Agrimen long 2008 long Kokopo. Na dispela pasin em i rong tru. Nau wankain pasin i laik kamap long Nesenel Eneji Polisi,” Mista Kaiabe i tok.

Gavman i bin kamapim NGCL long wokbung  wantaim  em insait long daunstrim proses sekta bilong wel na gas. Na NGCL i go pas long Domestik Maket Obligesen (DMO). Wok bilong NGCL em long lukim olsem olgeta 22 provins insait long PNG i mas kisim sea long ol gas risos.

Mista Kaiabe i tok PM Marape i bin tokaut pinis long dispela, tasol nau gavman i wok long abrusim NGCL long mekim wok bilong em.

“Olsem Siaman bilong NGCL, mi askim gavman long holim bek dispela propos bil na toktok wantaim ol stekholda olsem, dipatmen bilong Petroleum na Eneji, PNG Power Ltd , NGCL na ol arapela long skelim gut gen,” Mista Kaiabe i tok.