“LONG taim yumi pinisim 16 de bilong ektivisim na lukluk i go long taim bilong selebretim krismas, mi olsem presiden bilong Katolik Seif Haus Asosiesen i singaut strong long gavman na olgeta Non-Gavman ogenaisesin (NGO) long sapotim sios long adresim hevi bilong vailens long PNG. Yumi mas go het long wokbung wantaim na sapotim ol man, meri na pikinini husat i painim hevi bikos long vailans,”

Sista Thecla Gamong i mekim dispela toktok taim em na ol arapela sios lida na ol go pas man meri bilong ol seif haus long kantri i bin holim wanpela bung bilong ol long toktok long hevi bilong vailens long PNG.

Em i tok ministri bilong em i go het long helpim ol lain i painim hevi long vailens. Wantaim helpim na sapot bilong gavman, NGO na sios, olgeta i ken adresim gut dispela hevi.

Long wankain taim tu, sios i laik bai gavman i mekim hap bilong helpim ol man husat i save kamapim vailens. Ol i ken go stap na kisim kaunseling.

Nau i no gat hap we ol dispela kain man i ken go na kisim helpim na senisim pasin. Planti i save go tasol long kalabus, sampela taim dispela ino nap helpim ol.

I gat 7-pela seif haus long kantri, na olgeta dispela em bilong ol meri na pikinini tasol.

PNG em i kristen kantri na olgeta famili i mas gat papa, mama na pikinini. Ol papamama i mas gat gutpela rilesensip wantaim ol pikinini na inapim laik bilong ol.

PNG em i wanpela bilong ol kantri we vailens i antap tru, tasol gavman i no wari long dispela. Em i taim gavman i mas pinisim ol politikal hevi na lukluk long stretim ol kain hevi we i wok long bagarapim sindaun bilong ol pipel long kantri.

Kantri i no nidim seif haus sapos i gat gutpela sindaun long famili, bikos haus em i namba wan hap we i seif long famili i mas stap wantaim.

Sios i mekim bikpela wok wantaim helpim bilong ol NGO long adresim hevi bilong vailens. Nau em i taim gavman i mas putim han tu.

Carolyne Ketsimur i raitim