MORATA OFF-SISEN Ragbi Lig i bin statim kompetisen wantaim sinia man tim tripela wiken i go pinis bihain long ol meri tim i bin pilai namban wan gem bilong ol long Kone Tigers fil, NCD.

I gat 12-pela tim i bin rejista long resis na ol dispela ol meri em bilong Morata, Waigani, Tokarara na Geheru  na i mas stap aninit long Morata Lig Asosiesen.

Operesenel Menesa bilong Morata Off-sisen Lig, John Marme i tok ol tim bilong meri bai gat tupela pul na ol bai pilai faivpela wiken wankain olsem tim bilong ol man.

“Tupela meri tim long Morata em Maunten Bulls na Vikings i no bin kamap long namba wan gem bilong ol olsem na nau ol redi long namba tu gem we bai kamap long dispela wik long wankain taim,” Marme i tok.

“Mipela i laik lukim miks pilaia long wan wan tim na sapos yu save pilai long PRL o primia pilaia yu mas bruk na miks wantaim ol nupela meri na strongim long insait long fil,” Marme i tok.

Em i tok dispela kompetisen em bilong lainim ol nupela meri husat i no save long pilai ragbi long kam join na pilai.

“Sapos wanpela PRL o primia pilaia i laik joinim wanpela tim, orait ol i mas joinim tim i no save long pilai na givim taim long kisim fil pastaim na yu bihainim go insait,” em i tok.

Bikepla asua long las yia em ful tim bilong Paga Panthers na Koni Tigers, Royals i bin rejista long resis tasol long dispela yia bai no gat bikos planti nupela pilaia i laik pilai tu.

Mista Marme i tok tenkyu long opis bilong NCD long sponsa long dispela off-sisen, tasol bikpela sponsa bilong ol MVIL i no kam yet.

Bikpela senis long dispela yia em maski COVID-19, planti tim i rejista na amamas long resis wantaim bikos long las yia i bin gat 6-pela tim bilong ol meri.

“Mi laik tok tenkyu long olgeta tim bilong man na meri wantaim long dispela kompetisen na luk fowat long ol salens bai kam,” Marme i tok.

Jacklyn Kimala i raitim