SUPRIM Kot long Waigani i bin makim tude olsem de bilong kot tru namel long Peter
O’Neill na Spika Job Pomat long kamap.

Dispela i kamap bihain long Suprim Kot i mas surukim ol de bikos em i mas kisim taim long
harim na skelim askim bilong ol arapela lain husat i aplai na soim laik long stap insait long
dispela kot tu.
Dispela ol arapela lain em Praim Minista James Marape, Tresera Ian Ling-Stuckey, Fainens
Minista Raibo Paita na praivet loya Paul Paraka.
Ol i tok dispela kot i gat tok long ol na ol tu i mas givim toktok.
Tasol sindaun bilong Mande Suprim Kot long Waigani bihain long planti taim bilong
surukim ol aua bilong harim kot i tok nogat long askim bilong ol.
Praivet loya Alois Jerewai husat i bin makim Oposisen lida Belden Namah pastaim tru long
dispela de i tokaut long kot olsem em i gat laik long dispela kot tu na bai putim aplikesen
bilong em long soim laik bilong em tasol bihain i rausim na tok em bai i no inap kamap.
Dispela nau i lukim kot stret namel long O’Neill na Pomat long kamap.
Dispela Kot long Mande i lukim olgeta sia bilong ol jas i pulap wantaim Sif Jastis Sir Gibbs
Salika, Jastis David Cannings, Jastis Derek Hartshorn, Jastis George Manuhu na Jastis Ere
Kariko.
Ol loya i makim ol grup em Greg Sheppard i makim O’Neill, Charles Mende i makim Pomat
na praivet loya na pastaim Nesenel Kot jas Nemo Yalo husat i makim Atoni Jeneral Pila
Niningi.
Dispela kot i bin stat long 10 klok samting na pinis long 4.40 long apinun.
O’Neill i go long kot long askim Kot long tokaut olsem:
 ROT Spika Pomat i bihainim long singautim palamen kibung we i kamap long 17
Novemba i no bihainim lo, i no mas kamap na i no gat strong;
 OL toktok na ol lo we i bin kamap olsem kamap bilong 2021 Nesenel Baset i no
bihainim lo, i no mas kamap na dispela i no gat strong; na
 DISISEN bilong surukim palamen kibung i go long 20 Epril, 2021 i no bihainim lo, i
no mas kamap na i no gat strong long em.
Kot i bin askim O’Neill olsem sapos em i gat ol arapela toktok em i mas givim long Mande
yet.
Na sapos ol arapela lain husat i gat tok long dispela ol arapela toktok i mas aplai long asde
yet na soim olsem ol tu i laik stap insait long dispela kot.

Paul Zuvani i raitim