WOL AIDS De em i sans taim bilong wokbung na sapotim ol milien manmeri na pikinini husat
i stap wantaim HIV long wol.

Dipatmen bilong Jastis na Atoni Jeneral (DJAG) i bin kisim dispela sans long wokbung na
sapotim ol lain i gat HIV AIDS na tu ol helt woka na mausmanmeri bilong komyuniti husat i
save wokhat long givim ol sevis we ol HIV sikmanmeri i nidim long en.
Aninit long lidasip bilong Jenda Ikwaliti na Sosel Inklusen (GESI) Kodineta bilong DJAG, Teisi
Kalamo, DJAG i wokbung wantaim Nesenel AIDS Council na Anglicare PNG long luksave long
Wol AIDS De long Tunde Disemba 1. Ol i holim ol infomesen sesen long kapak bilong DJAG
na singautim olgeta wokmanmeri bilong DJAG na ol arapela gavman dipatmen i stap klostu
long kam lukim na kisim ol infomesen bilong HIV na AIDS na tu sapos ol i laik kisim HIV test
ol i ken kisim.
“Mipela i laik wokbung na sapotim ol manmeri husat i save wok wantaim HIV na AIDS na tu
mipela i laik helpim ol wokmanmeri bilong mipela long DJAG wantaim ol infomesen na tu
karim ol sevis bilong HIV testing i kam klostu long ol.
“Bikpela tingting long kamapim dispela em long wokbung wantaim olgeta long toktok na
stretim hevi bilong HIV AIDS,” GESI Kodineta Kalamo i tok.
Ripot i kam long Nesenel AIDS Kaunsil i soim olsem, namba bilong ol manmeri i stap
wantaim HIV long kantri em 52,000 we 48,000 em ol bikpela manmeri namel long 15 na 49
krismas na 3,200 em ol pikinini namel long 0 na 14 krismas.
Namba i go antap bikos saplai bilong marasin bilong HIV ol i kolim ART i no bikpela na ino
olgeta manmeri i gat HIV i kisim na tu ol manmeri i no wok long yusim kondom tumas olsem
na namba bilong ol manmeri na pikinini i gat HIV i go antap tru.

Rebecca Negere i raitim