OLSEM planti manmeri i save tok na we em i gat nem “Land of the Unexpected” Papua Niugini i ples bilong manmeri i kirap nogut long lukim, harim na pilim ol nupela samting.

Dispela i mas kain pilim we ol namba wan eksplora i bin gat taim ol i sua long nambis bilong kantri.

Sapos dispela i olsem dispela i mas wankain tu taim Australia gavman i givim luksave long Papua Niugini olsem em i ken stap bilong em yet taim ol lidaman olsem Sir Michael Somare wantaim ol wanwok bilong em i kamapim ol toktok bilong kisim independens.

Tasol taim ol i wok long toktok, planti ol manmeri i no gat gutpela skul, i no save wanem em Independens na mining bilong em.

Bikos long dispela i gat laik tu i bin stap olsem manmeri i mas gat skul na save long independens na laip bilong stap independen.

Dispela i stori bilong Wantok Niuspepa long watpo em i kamap.

Dispela ripota i raitim dispela stori bihainim stori em Pater Frank Mihalic, SVD “Co-Founder” na namba wan Edita bilong Wantok Niuspepa i givim long lotu skul long Divine Word University, Madang long wanpela Sande sampela yia i go pinis.

Pater Mihalic i tok Wantok Niuspepa i stat long Wewak, Is Sepik Provins long 1970.

Em i tok taim Sir Michael wantaim ol politisen olsem Sir Julius Chan, Sir John Guise, Sir Maori Kiki, Sir Peter Lus na ol arapela lida long dispela taim long 1968 i wok long toktok long kisim independens, Bisop Leo Arkfeld, SVD husat i bin stap bisop bilong Wewak Daiosis i lukim olsem planti manmeri i stap long bus ples, no gat rot, i no gat skul na i no save wanem em independens.

Bisop Leo i pilim olsem sapos kantri i mas independens, manmeri i mas save long rit na rait, Tok bilong God na mining bilong independens.

Dispela i mekim em i kamap wantaim tingting bilong manmeri i mas skul na save long wok divelopmen.

Long wankain taim Bisop Leo i tingting long yusim balus long bringim skul long ol.

Dispela i mekim Bisop Leo yet i go trening na kamap pailot na em i salim Pater Mihalic husat i bin wok long wanpela peris long Sepik Wara long go skul jenolis.

Taim tupela i go bek long daiosis, tupela i kamapim Word Publishing Company Limited na pepa bilong em Wantok Niuspepa long 1970.

Ol i makim Wantok Niuspepa olsem pepa bilong Tok Pisin na yusim dispela tok we ol manmeri i ken save long ol toktok long tok bilong ol stret.

Bisop Arkfeld i kamapim tu balus kampani na i kolim Wirwui Air na i salim tok long manmeri long kamapim ol ples balus we em i ken bringim skul na Tok bilong God.

(Dispela wok em Bisop Leo i skruim taim em i kamap bisop bilong Madang Asdaiosis long 1975).

Wantok Niuspepa i stap long Wewak inap long 1974, we ol i bringim pepa i go long Pot Mosbi.

Paul Zuvani i raitim

Inap long dispela taim, pepa i stap na prin long Mosbi.

Arere long Wantok Niuspepa, mama kampani, Word Publishing i bin kamapim ol arapela pablikesen olsem The Times (Independent), PNG Business, Sport Nius na New Nation.

Bikos long hevi bilong mani, kampani i pasim dispela ol arapela pablikesen na Wantok Niuspepa i stap yet na go het long bringim nius long Tok Pisin olgeta wik.

Tude i makim 50 yia bilong em long kamap na wok.

Hepi Anivesari Wantok Niuspepa!