TWENTI sikis kendidet i sanap resis long sia bilong Presiden insait long dispel 2020 Bogenvil Jenerel Ileksen.

Namel long olem tupela meri; Magdalene Toroansi na Ruby Mirinka.

Dispela Sia em olpela Presiden Sif Dokta John Momis, husat i bin holim long tupela tem. Em i bin lusim bihainim Konstitusen o mama lo bilong Bogenvil we i tok orait long wanpela man o meri long stap Presiden long tupela tem tasol.

Momis i bin traim long senisim mama lo bilong ABG bai em ken sanap resis long namba tri taim, tasol Suprim kot bilong PNG i no bin tok orait long em. Olsem na Momis em i no sanap resis long dispela ileksen.

Long ol arapela sia 524 kendidet olgeta i wok long sanap resis long dispela ilekson. Insait long dispela namba 428 kendidet i resis long 33 konstituensi na namel long ol 12-pela meri kendidet tu i resis.

Long sia bilong ol meri 27 meri i resis long 3-pela makim wan wan Rijon; (Not, Sentral na Saut Bogenvil. Not Bogenvil i go pas wantaim 12-pela kendidet na bihain long ol Sentral Bogenvil wantaim 10-pela na Saut Bogenvil i gat 5-pela kendidet i resis.

Long sia bilong ol eks paitman (Ol man i pait long bikpela pait bilong Bogenvil) 43 i sanap resis long sia bilong ol eks paitman. Ol tu makim 3-pela rijon; Not, Sentral na Saut Bogenvil. Not Bogenvil i gat 22 kendidet eks paitman, Saut Bogenvil i gat 11-pela na Sentral Bogenvil i gat 10-pela kendidet.

Haku konstituensi long Not Bogenvil, wantaim 23 kendidet i gat bigpela namba, winim ol narapela konstituensi na Lato konstituensi long Bana Distrik, Saut Bogenvil, i gat 6-pela kendidet tasol.

Poling bai stat long Trinde 12 Ogas, 2020 na bai pinis long Tunde 1 Septemba, 2020. Kaunting bai stat long Trinde 2 Septemba na bai pinis long Mande 14 Septemba.

Opis bilong Bogevil Elektoral Komisina i stap sambai long kamapim wanpela gutpela ileksen we bai i fri na fea na long wankain taim em bai givim san long olgeta manmeri husat inap long vot wantaim long ol lain i gat sampela bagarap long bodi bilong ol (disabiliti) long votim man ol i lakim.

Komisina bilong Bogenvil Ileksen Mista George Manu i bin tok long wanpela bung long Buka olsem i gat liklik hevi long sait bilong mani bikos ol i laikim K13.5 million tasol ol kisim tasol K7.5million. Em i tok ol laikim yet narapela K6 million na em i bilip gavman bai givim yet dispel mani.

Mr. Manu i bin tok olsem, Em tok tenkyu long ol dona patna bikos wantaim helpim bilong ol, ileksen bai i kamap stret long ol deit ol makim pinis.

Paul Wagum i raitim