MANMERI i mas amamas na tok tenkyu long ol tumbuna husat i tingting na sanap strong long banisim kantri bilong yumi, Gavana Jeneral Sir Bob Dadae, i tok.

Em i tok yumi mas tingim sakrifais ol i mekim long Wol Woa II long kamapim bel isi na gutpela sindaun long kantri.

Em i mekim dispela tok long dispela yia Rimembrens De long las wik wantaim het tok, “Laip bilong ol, em stronpela tingting bilong yumi (Their life, our inspiration).

Sir Bob i tok ol tumbuna bilong yumi olsem Fuzzy Wuzzy Angel i mekim bikpela sakrifais.

“Wanem em prais bilong difenim fridom nau yumi gat. Dispela fridom i stap long Mama Lo bilong yumi,” em i tok.

“Bikos long hat wok bilong ol, yumi nau i gat gutpela sindaun.

“Yumi i mas go het long strongim dispela tingting ol i mekim long sakrifais bilong ol.”

Sir Bob i askim tu sapos yumi mekim ol wok long kamapim gutpela helt, welti na seif kantri.

Em i ritim tok bilong biknem Amerika Sivel Rait lida, Martin Luter King husat i tok,’ Mi gat driman na dispela driman em olgeta manmeri, maski kala, bilip o rijon; yumi i wankain” long strongim tingting bilong ol manmeri.

“Long tude na go, mi askim ol manmeri long bihainim ol Kristen Veliu, olsem ol i mas laikim wanpela na narapela long kamapim bel isi.

“Mi mekim dispela tok long taim sindaun bilong kantri i bagarap, we i gat kros pait na bel hevi long ol komyuniti.”

Sir Bob i tok i no gat moa rispek long laip, we i gat hevi bilong jenda bes vailens long ol meri, long pasin bilong kisim nating graun, raskol pasin, rijonal pait na korapsen.

“Yumi olgeta i mas kirap na pait agensim dispela ol kain pasin.

“Yumi mas strongim tingting ol tumbuna bilong yumi i bin gat taim ol i mekim sakrifais.”

Sir Bob i askim manmeri long go bek long pasin bilong disiplin na bihainim ol Kristen prinsipel long kamapim bel isi long ol komyuniti.

Em i tok ol papamama i mas givim gutpela skul long ol pikinini long kamap gutpela sitisen bilong kantri.

Ol manmeri i no ken paul na lus tingting long sakrifais ol tumbuna bilong yumi i bin mekim.

Paul Zuvani i raitim