WANPELA grup long Wes Kos Nu Ailan Provins, West Coast Development Foundation i tok nogat long sibed maining wok long kamap long solwara bilong ol.

Las wik ol i putim wanpela objeksen long laisens EL 2357 long opis bilong Mineral Risos Atoriti.

Wantaim dispela objeksen o tok nogat bilong ol, ol i givim notis long Nu Ailan Provinsal Gavman na Edministresen bilong en na tu long nesenel gavman.

Ol i tok i sanap yet long tingting olsem dispela wok bilong risets long sibed maining long solwara bai i no bringim gutpela sindaun long laip bilong ol.

Taim maining woden i holim bung wantaim ol pipel long Labur, long Wes Kos Namatanai long wik i go pinis, olgeta pipel husat i bin stap long bung I bin tok nogat long nupela sibed maining wok long kamap.

Mausman bilong grup Jonathan Mesulam i tok Nautilus Minerals husat i bin stap pastaim i no gat nem moa tasol olsem wanem na nau nupela kampani Deep Sea Mining Finance Ltd i kam mekim wok bilong kisim tingting bilong ol pipel?

“Mipela i tok no gat pinis, na mipela i no senisim tingting. Mipela i laikim solwara bilong mipela i stap fri,” Mesulam i tok.

Insait long objeksen ol i gat sapot tu i kam long ol arapela maritaim komyuniti long Is Nu Briten, Manus, Madang na Milen Be. Ol i kisim sapot tu long Provinsal Gavman na Edministresent bilong ol long Nu Ailan.

Mesulam i tok Nu Ailan Provinsal Gavman I gat tambu long ol nupela eksploresen wok stat long 2009 yet i kam. Em i tok tu olsem Praim Minista James Marape i bin mekim tu wanpela bikpela toktok bilong tambu long sibed maining long Pasifik Ailan Forum na olsem wanem nupela kampani i laik statim wok bilong sibed maining gen?