WANPELA papa long Is Sepik Provins i bilip holim graun na wok antap long en, em i ki bilong gutpela sindaun long Papua Niugini.

Isaiah Sanduma i save givim planti taim bilong em long wok na lainim pikinini man bilong em, Isaiah Sanduma Junior long wok long graun bilong em.

Yangpela Isaiah i gat 9-pela krismas na em i gat 300 kakao diwai pinis. Em i skul long Wilaru Praimeri Skul long Wes Yangoru LLG, long Yangoru-Sausia Distrik.

Mista Sanduma i tok ol pipel long PNG i save long pasin bilong wok long graun long wanem graun i stap long han bilong ol. Tasol ol i mas wok strong long lukautim ol yet na tu long helpim ikonomi bilong kantri olsem na ol i no ken les long wok wantaim graun.

Em i tok taim ol i wok na groim ol samting olsem kakao na salim long maket ol i mekim mani na long wankain taim kantri tu i mekim mani na ikonomi bilong PNg i ken gro.

Lukluk i go long bihaintaim em i tok ol pikinini i mas lainim long wok wantaim graun nau yet. Dispela bai i givim promis olsem ol bai i gat gutpela sindaun long bihain.

Ol papamama i gat wok long lainim ol pikinini bilong ol na givim gutpela fiutsa long ol. Graun i stap pinis na I wetim ol.

“Mi givim planti taim long yangpela Isaiah bikos mi laikim em i mas poro gut wantaim graun bilong em na save long wok long graun,” Mista Sanduma i tok.

Mipela i wok wantaim kakao bikos long nambis dispela keskrop i save gro gut na givim promis long bringim gutpela mani long helpim sindaun bilong mipela.

Long piksa yangpela Isaiah i holim sarep na helpim long klinim kakao blok bilong em. Long narapela piksa em i helpim papa long planim ol yangpela kakao diwai.

Mista Sanduma i tok pasin bilong lukim na mekim o bihainim bai i helpim pikinini long lainim hariap. Em i bilip dispela i ken helpim pikinini long skul wok bilong em tu. Isaiah Junior I mekim gret 3 long dispela yia.