RAGBI Lig em bodi kontek gem we i save nidim strongpela difens long winim resis namel long tupela tim bikos long olgeta gem wanpela tim tasol i save win na narapela bai no gat,” Het kosa bilong Difending sempian Stanley Tepend i mekim dispela tok.

“Mipela nid long stretim sampela asua insait long gem we i bin kamap na go het long strongim difens na lokim namba wan ples bilong mipela,” Tepend i tok.

“Mi amamas long ol mangi i givim moa pawa long olgeta foapela raun bilong Digicel Kap na nau mipela bai lukluk long daunim olgeta resis na sindaun long namba wan ples,” em i tok.

Em i tok Edene Gabbie husat i save pilai long ovasis raun bai pilai long dispela wik bihain long em redim em yet gut long stat pilai long winga na helpim fulbek Joe Joshua long ol arapela raun bilong 2020 sisen.

“Mipela i nid long lokim yet namba 6, 7, 9 na 1 bikos em ol pawa namba bilong tim, na ol fowat em kain ol hevi wan namel long fil na bihain mipela i ken senisim ol pilaia i go kam ausait long fil,” Tepend i tok.

“Maski mipela difending sempian tasol olgeta tim i strong long rausim dispela taitel long mipela, olsem na mipela i mas wok strong wantaim difens long lokim taitel,” Tepend i tok.

Jacklyn Kimala i raitim