SMALL na Medium-size enterprise (SME) long PNG bai kisim bisnis edvaiseri sevis bilong sapotim ol long senis na stap strong long taim bilong COVID-19.

Dispela sapot i kam yet long Business Link Pacific (BLP).

PNG Bisnis ekspet Ernie Gangloff wantaim  BLP  Menesa Apeo Tearikifareata i wok long mekim awenes program long kantri na ol i askim ol bisnis ona long save gut moa long ol kain sapot we ol i ken kisim long BPL

“Business Link Pasific i gat ol kwaliti edvaisa i stap long PNG. Ol i ken helpim ol bisnis i kamap  gut long PNG,” Mista Gangloff i tok.

Em i tok ol saksesful bisnis i save kamap gut bikos ol i kisim skul long ol ekspet.

“BLP edvaisa netwok i karamapim ol eria olsem, fainens, akaunting, hiuman risos, maketing na infomesen teknoloji na sampela moa,” em i tok.

BLP  i save givim 50 pesen sabsidi long ol edvaiseri sevis na dispela i karamapim 100 pesen bilong olgeta kost bilong ol bisnis edvais we i menesim kik bek bilong COVID-19. Ol SME husat i gat intres long kontekim BLP i ken salim email long PNG@businesslinkpacific.com.

“Em i gutpela sans we ol Papua Niugini SME bisnis i no ken abrusim. Dispela em bilong helpim ol liklik bisnis long kamap gut na sanap strong long taim bilong hevi,” Mista Gangloff i tok.

“Long wankain taim ol edvaisa bilong PNG tu i stap long dispela grup. Ol i gat luksave long wok bilong ol na ol i go het  tu long gro wantaim ol bisnis bilong ol,” em i tok.

BLP em i program we Nu Silan gavman i fandim insait long 6-pela Pasifik kantri na PNG.

Carolyne Ketsimur i raitim