MINISTA bilong Egrikalsa, John Simon i tok disisen bilong gavman long helpim kantri long gro na bihainim tu het tok bilong Marape gavman long ‘Kisim Bek PNG’ i mas go stret wantaim ol rurel pipel na prodaksen ol i kamapim.

Em i tok dispela long wanem moa long 80 pesen manmeri i stap long ol rurel ples.

Mista Simon i mekim dispela tok long taim em i bihainim Memba bilong Midel-Ramu Johnny Alonki long Madang Provins long las wik.

Minista i bin go long ples Kwanga we em i wokabaut kisim olsem 12 aua i go long dispela rurel ples long Midel-Ramu distrik.

Ol het bilong ol komoditi bod i go tu wantaim Minista na Memba long dispela raun.

Ol rurel fama long Midel-Ramu i save kisim strong long kakao prodaksen bikos kakao i save helpim ol long kisim mani long sapotim sindaun bilong famili na komyuniti.

Minista i lukim tu hatwok na pen ol fama i save pilim i bin kamap taim ol memba bilong wanpela kakao kopretiv grup i bin bungim Simon na i askim em long go long hap bilong ol na lukim na pilim stret wanem kain pen ol pipel i save bungim.

Minista i raun tu long ol arapela hap bilong provins we Kokonas Indastri Koporesen (KIK) i stap na em i lukim Stuart Risets Stesin long Murunas long not kos rot (NCR).

Long lukluk raun bilong Minista Simon long Sumkar distrik em i bin go wantaim MP bilong Sumkar na Minista bilong Koreksenel Sevis, Chris Nangoi, we tupela wantaim delegesin i bin go long ples Mirap long Sumgilbar LLG na harim ol kakao na kopra fama i autim bel-hevi bilong ol na salens ol i bungim long taim prais bilong kopra na kakao i stap daunbilo.

Ol fama i amamas olsem minista i lusim bikpela opis bilong em na go daun harim wari na hevi ol fama i save bungim oltaim long sait long kakao na kopra prodaksen.

Ol fama long Sumkar i tokaut olsem dispela raun bilong Minista Simon em namba wan taim tru wanpela egrikalsa minista i go stret long ples harim bel hevi bilong ol rurel fama.

Minista Simon i bin go lukim tu wanpela bikpela kakao neseri long Sumgilbar we wanpela asosiesen ol i I groim moa long 60,000 kakao sidlings we ol i redim long planim.

Las wokabaut bilong Minista Simon i lukim em i go long helikopta na raun i go lukim naispela veli bilong Midel-Ramu em graun i gat gutpela gris na i orait stret long kamapim bikpela egrikalsa prodaksen long ol kes krop.

James G. Kila i raitim