“DISPELA blut yupela i bin penim long haus bilong yupela bai stap olsem mak. Na taim mi mekimsave long ol Isip bai mi lukim dispela blut na bai mi abrusim haus bilong yupela na larim yupela i stap gut (Kisim Bek: 12:13).”

Wanpela pasto long wanpela kantri i laik go lukim ol bilip manmeri long wanpela ples. Taim em i kamap long dispela ples, em i lukim mama kakaruk i stap wantaim ol pikinini bilong em.

Ol liklik kakaruk wantaim mama bilong ol em ol i bin penim wantaim retpela pen.

Pasto i askim ol lain i stap long dispela ples, “Bilong wanem yupela i penim ol liklik kakaruk wanaim mama bilong ol long retpela pen?”

Ol i bekim, “Ol kakaruk i gat wanpela birua tru i stap. Em i wanpela bikpela pisin i save kaikai ol. Tasol dispela pisin i no save laikim retpela kala, olsem na taim em i kam bilong stilim kakaruk na i lukim ol retpela mak olsem long gras bilong ol, em i save lusim ol na i go painim ol kakaruk i no gat retpela kala.”

Yumi manmeri tu i gat birua i laik kaikai yumi olsem Buk Baibel i tok.

“Satan i dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai (1 Pita 5: 8).”

Bai yumi hait gut olsem wanem na em i no inap kaikai yumi?

Blut bilong Jisas em i strongpela banis na gutpela mak bilong helpim yumi.

Satan i no inap daunim strong bilong blut bilong Jisas. Taim em i lukim mak bilong blut bilong Jisas, em i save pret na ranawe.

Bipo tru ol lain Israel i bin penim blut bilong sipsip long haus dua bilong ol. Taim God i kilim namba wan pikinini bilong ol Isip na em i lukim mak bilong blut bilong sipsip long haus dua bilong ol Israel, orait em i save abrusim na larim ol i stap gut.

Dispela em i gutpela piksa bilong samting i kamap bihain.

“Tasol nau Krais i kam pinis... Em i no kisim blut bilong meme na bilong pikinini blumakau na i go insait long haus lotu. Nogat. Em i mekim ofa long blut bilong em yet, na em i go insait long haus lotu wanpela taim tasol. Na em i baim bek yumi bilong oltaim oltaim (Hibru 9: 11-12).

Birua em i no save slip na malolo long wanpela aua na minit, olsem na yumi tu i no ken lus tingting.

Yumi laik hait insait long blut bilong Jisas na tenkyu long bikpela Jisas i bin mekim bilong baim bek yumi.

Tupex Jerry Kolom