LONG begin bilong mun Mas, mi bin flai wantaim Caroline Wälde i go long Moropote long givim wanpela kos bilong stretim bagarap long spirit (trauma healing).

Caroline i wok wantaim Liebenzell Mission na inap planti yia nau em i save go ranim wan wik kos bilong ol pipel long Moropote eria olsem hap bilong Baibel Skul.

Mi save long Caroline long Wewak we em i stap wantaim famili bilong em. Bikos long Caroline, mi save nau long haus kalabus bilong ol meri we olgeta wik mipela i save go wokim felosip wantaim ol meri long 2019 i kam inap nau.

Long taim mipela i kamap long Moropote, mi amamas long lukim ol pipel mi bin bungim bipo. Famili bilong mi i bin go stap wan wik long Moropote long Ogas 2018 long MAF PNG tok ples na kalsa kos. Mipela i amamas long ol pipel na ples bilong ol, olsem na wanpela wiken long Janueri long dispela yia, mipela i bin kisim papamama bilong man bilong mi, i go lukim Moropote.

Ol pipel bilong Moropote i bihainim pasin bilong ol na i singsing wantaim long tok welkam long mitupela Caroline. Ol i singsing na tok welkam long mi wantaim wanpela naispela pas we ol i kolim nem bilong mi "Haleta" i wankain olsem "highlighter" long tok Inglis. Mi wanbel long dispela!

 Poto kepsen

Dispela trening kos bilong stretim ol bagarap long spirit, (trauma healing) mipela i kisim i go long Moropote i tok klia long ol pen na wari bilong sua i kamap long bodi na spirit, na olsem wanem yumi ken helpim ol arapela manmeri Mipela i toktok long wanem samting God i tok long dispela hevi, wanem samting yumi ken lainim long Baibel na pasin bilong lusim rong bilong ol arapela. Ol dispela topik i pas wantaim ol hevi bilong dispela kantri we planti pipel i no inap long kisim helt sevis na i dai long taim ol i yangpela yet. Ol lain husat i gat hevi long tingting i no gat sans long kisim helpim bikos ol i stap longwe tru.

Mipela i bin gat gutpela wik tru. Namel long foti na foti faiv studen, ol man na meri wantaim, i bin kam long dispela kos long olgeta de. Olgeta de ol i save skul inap foapela aua long moning na long apinin ol i skul tupela aua. Mipela olgeta i lainim ol samting long dispela trening program. Ol pipel i serim eksperiens na tingting bilong ol na mipela tu i givim sampela stia toktok long kalsa bilong mipela long ol. Na mipela olgeta i lainim tok i kam long  buk Baibel. Mipela i gat taim tu long singsing, tok pilai na i go waswas long wara na pre long nids bilong wan wan manmeri.

Mipela i gat sans tu long stori gut wantaim ol meri. Ol i askim kain kain kwesten long dispela kos na ol i serim stori long laip bilong ol yet. Ol i save kam lukim mipela long taim mipela i no bisi tumas na i no gat planti lain i stap klostu. Ol i no gat kain sans olsem long autim tingting bilong ol bikos ol i no laik ol arapela lain i harim na i go tok baksait. Caroline i save gut long Tok Pisin olsem na mi sindaun klostu long em taim em i toktok wantaim ol meri.

I tru olsem mi no save gut long Tok Pisin, tasol mi pre long lewa bilong mi long ol dispela meri na ol toktok ol i autim. Ol i laik save watpo lek bilong mama i solap taim em i gat bel; wok bilong ol man na meri long sios; toktok long vanila gaden; na ol hevi long edukesen bilong ol pikinini.

 Mi bin salim tu ol audio Baibel, Tok Pisin Baibel, sampela aiglas bilong rit, na ol Jesus DVD. Olgeta dispela samting i kam long CRMF, na i save stap long wanpela Baibel bokis em Wilfred (man bilong mi) i save karim long balus. Em i givim mi long taim mi laik go long dispela trening kos bikos ol pipel i bin askim long ol audio Baibel.

 Mi lukim strong bilong ol dispela pipel long dispela taim. Misis A i bin karim bebi wanpela mun i go pinis, tasol olgeta de em i karim bebi long bilum na kisim narapela liklik pikinini na ol i kam sindaun long fran stret. Mista B i no inap long harim ol toktok long baksait, tasol em i tokim mipela olsem em i wanpela prea waria na i pre long mipela long taim bilong kos. Em i tokim mipela long raitim ol prea poin na bai em i karim i go long haus. Mista H i save bringim liklik pikinini bilong em i kam na pikinini i painim wanpela gutpela ples bilong slip.

Dispela kos i pinis long Fonde apinun.  Long taim mipela i tok gutbai long ol studen, Luke, husat i save sindaun long HF redio olgeta moning na apinun, i toktok long COVID-19. Ol toktok i no klia tumas, na mi luksave olsem ol pipel husat i stap longwe tru we i no gat teknoloji na midia, i no klia long wanem samting i kamap long ol arapela hap bilong wol. Ol stori ol i harim em i tok tru o nogat?

Wanem mining bilong dispela sik? COVIV-19 i kalap i go long wanem ol kantri nau? Na COVID-19 i kamap pinis long PNG o nogat? Mipela tu i no klia tumas! g for Life

Mitupela Caroline i ritim tok i stap long Buk Song 91: “Yu save banisim mi na yu was gut long mi. Yu God bilong mi. Mi save bilip long yu!” Mitupela ritim pinis na mipela i kaikai naispela pis ol pipel i karim i kam givim mipela:

Long moning balus i kam kisim mipela i go bek long famili bilong mipela. Mipela i amamas long dispela wik wantaim ol pipel. Mi yet i bin redi long go givim dispela trening long ol pipel.

Mipela i bin lusim ples bilong mipela long Netherlands na kam stap wantaim MAF moa long tripela yia nau, na long namba wan taim tru mi bilip olsem: Yes, dispela i wok bilong mi!

Stori: Harriëtte Knigge