TAIM ol 10-pela bikpela ovasis kantri olsem Amerika, Brazil, Rasia, India, Yunaitet Kingdom, Spein, Peru, Itali, Iran na Jemeni husat i wok long i go pas long kisim taim long sik coronavirus, kantri bilong yumi em i stap na sindaun gut, long wanem taim dispela sik em i bin kamap long kantri, 8-pela lain man, meri na pikinini i bin kisim dispela sik.

Na bihain liklik, ol i bin kamap orait gen na i go bek long haus na famili bilong ol.

Tasol planti askim wok long kamap namel long ol man na meri olsem, sapos long ol bikpela kantri olsem Amerika husat i gat ol gutpela haus sik, helt fesiliti na ol saveman na meri bilong helt, long wanem as na bikpela namba bilong ol man, meri na pikinini i wok long kisim coronavirus na i wok lusim laip.

Nau yet long taim Wantok Niuspepa i mekim dispela stori ripot bilong COVID-19 helt ripot 8,400,129 kes na long dispela 451,263 i bin dai.

Long dispela Amerika i go pas wantaim bikpela namba bilong ol manmeri na pikinini i kisim sik COVID-19 wantaim 2,234,471 na long dispela 119,941 i dai.

Tasol dispela namba bilong kisim dispela sik i no go daun na stop, nogat, em i wok long  go antap yet.

Long ol kantri we i kisim COVID-19, Papua Niugini i sindaun long las ples wantaim 8-pela kes bipo tasol nau i go antap long 11 kes. Long dispela namba olgeta i kamap orait.

Tasol taim ripot bilong dispela sik i kamap long kantri, planti manmeri i pret nogut tru. Ol i stap long haus bilong ol tasol.

Bihain long dispela ol i no save as bilong sik i no go bikpela na no gat ripot long wanpela bilong ol dispela lain husat i kisim COVID-19 i dai.

Sampela i tok dispela sik i bilong ol waitman tasol na olsem i kilim ol waitman tasol sampela i tok PNG i seif bilong long Grasia na strong bilong Papa God na mipela i stap orait.

Na dispela i givim planti kain kain tingting tu long ol manmeri long kantri bilong yumi. Sampela ol i tok, dispela sik em i bin kamap na i stap pinis insait yet long kantri long ol yia i kam na i go.

Na ol arapela i tok, bikos long PNG em i Kristen kantri, Papa God em i mekim na yumi abrusim dispela sik coronavirus. Sampela i go moa na i tok, bikos long ol samting we i wok long gro long ol envairomen bilong yumi we i helpim yumi long daunim dispela sik.

Dispela ol tingting  i bin kamap, tasol ol helt atoriti long kantri husat i save i go pas long lukautim ol helt i kamapim tu bikpela wok long wei bilong stopim kamap bilong COVID-19.

Isten Hailans Provinsol Helt Atoriti (EHPHA) i wanpela long ol bodi we i bin kirap na kamapim bikpela wok long stretim ol ples slip bilong ol siklain, ol woklain husat bai i go pas long lukautim ol siklain bilong COVID-19.

“Taim tokwin bilong sik COVID-19 i bin kamap long Novemba 2019, yumi wantaim ol divelopmen patna bilong yumi i bin sindaun na wetim dispela sik long kam na bringim tu ol bagarap long ol pipel tasol i go het na toksave long 8-pela distrik long provins long putim was na banisim yumi yet long kamap bilong dispela sik.

Isten Hailans i bin wanpela COVID-19 kes we wanpela lokal meri long Samatoka hauslain long Daulo distrik i go raun long Lae, Morobe Provins na kisim.

Ol i putim em long Goroka Provinsal Haus sik tasol bihain em i kamap orait.

Bikos long dispela em i gutpela nius na risal, em i mekim menesmen na ol helt woka bilong EHPHA i amamas tru.

Dokta Josepha Apa, Sif Ekseketiv Opisa bilong Isten Hailans Provinsal Helt Atoriti (EHP PHA) wantaim ol menesmen tim bilong em i bin amamas long wok wantaim polis na ol arapela patna stopim kamap bilong dispela sik long provins.

Ol bisnis haus na ogenaisesen long Goroka na Isten Hailans olsem Isten Hailans Provinsol Gavman, SENGDA Grup ov Kampani, Istana Trading, Bird of Paradise Hotel na Telecom PNG i bin kamap na givim fainensel sapot na ol kaikai, wara na ol arapela samting moa long helpim ol polis opisa na helt woka husat i mekim awenes wok long provins.

Wok bilong mekim ol wok bilong kempen na edvokesi em i bin kamap gut tru we ol helt woka wantaim ol polis opisa i bin raun i go long ol rurel na kamapim wok.

 “Mipela i amamas long lokal NBC Isten Hailans husat i bin helpim long kempen na edvokesi long bringim toksave bilong sik coronavirus i go long olgeta manmeri na pikinini”, Dokta Apa i tok.

 “Kain sevis bilong lokal redio em i stap long givim gutpela infomesen olsem na taim mipela i yusim dispela sevis, mipela i lukim gutpela kaikai bilong em.”

Nau yet long provins, operesen bilong olgeta kain kain sevis bilong pablik na praivet sekta i go bek olsem bipo, tasol pret bilong sik COVID-19 i stap yet.

Yumi mas was gut, wasim han olgeta taim, stap longwe long narapela inap long tu mita na i no ken bung na i stap wantaim ol grup na sapos yu sik, stap long haus na stap longwe long ol arapela.

Taim yumi bihainim dispela ol toksave, yumi ken sevim laip bilong yumi yet na bilong ol arapela lain tu.

Sape Metta i raitim