Ananit long European Eunion (EU) Support To Rural Enterprenueship Investment Trade (STREITPNG),we i lukim ol wok awenes long wok bilong planim kakao long Sepik Rijon.

Dispela i bihainm wanpela wokabaut bilong Wewak Distrik Tim i go long ples Sup long Muschu Ailan long wik i go pinis.

Insait long ol toktok, kodineta na man i go pas Mista Timothy Sam i tok, ol i laik makim 4-pela ples insait long wan wan LLG long distrik long kamap olsem model o grup i go pas long dispela wok bilong kakao.

Em i tok, dispela kakao i gat skul bilong em long lukautim we bai i kam wantaim dispela program. Na namba wan samting em ol fama i mas gat kakao long blok pastaim.

Mista Sam i tok, i gat planti rot long planim kakao klon, we namba wan samting fama i mas save long badim kakao. Na taim em kisim dispela save pinis em bai i mekim wok bilong em long kakao blok bilong em moa isi long wok em yet.

Wewak Distrik kodineta bilong STREIT PNG Timothy Sam i tok moa olsem i tru i gat planti program bilong wok kakao i kirap nau, tasol bikpela samting em olgeta mas givim gutpela skul long ol fama.

Long dispela awenes na trening i lukim klostu 35-pela fama man, meri na ol yangpela i bin kisim skul long pasin bilong wokim bading long kakao.

Program i bin givim sampela buk long helpim ol fama long ritim na kisim moa save long wok bilong kakao.

Mista Sam i tok wankain moa tok awenes bai kamap long ol narapela wod long distrik long wik i kam. 

Jonathan Poema i raitim