PAILOT Wilfred Knigge em wanpela stail mangi tru. Taim dispela pailot bilong Nedalen i pundaun long ol liklik ples balus em i go long en long PNG em i save bringim naispela  pasin na smail bilong em wantaim.

Taim em i putim balus long graun pinis na ran i go long henga na stopim balus pinis em yet i save kam ausait long balus na helpim ol pasindia i kam ausait na rausim ol kago bilong ol tu.

Bihain em bai i sekim balus sapos balus i stap gut yet bihain long em i pundaun long ples balus. Dispela em i nomol wok bilong ol pailot.

Em i mekim dispela pinis orait em i wokabaut raunim balus na skelim hevi bilong ol kago na pasindia bilong narapela ran bilong dispela MAF balus gen.

Pailot Wilfred em man bilong mauswara tu olsem na taim em i mekim ol wok bilong em, em i save tok pilai na pani wantaim ol wanwok bilong em long ples balus na ol arapela i sanap na lukluk long em.

Taim Pailot Wilfred i pinis em i save rausim wanpela blakpela bokis insait long as bilong balus. Yes, planti i save ting em i laik mekenik long balus o? Tasol nogat. Insait long blakpela bokis ya em ol samting bilong helpim long stiaim laip bilong ol pipel.

Pailot Wilfred i save opim bokis ya na salim ol Buk Baibel na Baibel i stap long ol liklik masin bilong harim (Odio Baibel) tu na planti arapela Kristen risos long liklik prais tasol long ol pipel i stap long ples balus.

Dispela em i nomol hap wok bilong Pailot Wilfred. Em i no pilim olsem em i mekim ekstra wok o spesel wok.

Taim em i raun long ol liklik balus na givim aut ol Baibel em i save wanem ol hap ol i hangre tru long dispela buk. Em i save kolim ol ples ya, ol ‘Baibel hotspot’. Wanpela dispela ol ples em Nungwaia long Is Sepik Provins.

Pailot Wilfred i stori liklik long raun bilong em.

“Long stat bilong dispela yia mi karim tupela bokis i pulap long ol Baibel i go long Nungwaia. Insait long tupela bokis wantaim em 80 Baibel olgeta. Sios long Nungwaia em i ektiv na helpim tu long Hailans na Yatoam long Hela Provins. Nau yet Nungwaia i sapotim Yatoam long wokim wanpela misin haus long dispela ples.

“Sampela wik bihain mipela i flai bihainim rot bilong Wewak-Nungwaia-Sibilanga. Nungwaia em i klostu long Wewak na em i namba wan stop mi save mekim. Taim mi kamap ol i save pinisim olgeta Baibel na ol samting mi karim.

“Na olgeta taim mi kamap long Sibilanga ol i save askim mi long Baibel tasol mi no gat moa Baibel, bikos ol i pinis long Nungwaia yet. Mi save sori taim mi no gat moa Baibel long salim.

“Tasol laki MAF i gat dairek ran tu i go long Sibilanga na mipela i ken karim ol Buk Baibel, ol aiglas na ol diksineri.”

“Narapela hotspot bilong salim Baibel em Moropote long Is Sepik Provins. Ol pipel long hia i save laikim tru ol odio Baibel. Dispela ol odio Baibel i stap long ol liklik masin na i save ran long sola pawa.

“Planti taim, taim mipela i kamap long Moropote ol i save kam askim long Baibel.

“Long pinis bilong Janueri mi na famili i stap long Moropote na mipela i kisim sampela oda tasol mipela i no gat moa dispela ol Baibel.

“Mi go bek long Janueri na bihain tupela taim long Februari na ol pipel i askim yet, tasol mi no bringim ol Baibel.

“Bihain long Mas 16 meri bilong mi Harriette i go long Moropote na em na pren bilong em long Liebenzell Misin i ranim wanpela troma hiling kos. Em sans i kamap. Mipela i putim planti Baibel insait long blakpela bokis na karim i go long ol pipel bilong Moropote,” Pailot Wilfred i tok.

Em i lukim olsem planti pipel long Yatoam i laikim tru Baibel. Dispela askim bilong Baibel i stap tu long Anguganak, Oksapmin na Ok Isai. Ol pipel long Ok Isai i bin baim planti odio Baibel las yia na ating ol i gat inap.