PRAIM minister James Marape na Australian Hai Komisina, Jon Phil pi lonsim Coral sea cable system (CS2) las wik long Pot Mosbi.

Dispela kebel sistem bai bringim gutpela sevis long Papua Niugini na opim sampela rot bilong ikonomik divelopmen.

Dispela kebel em i 4700km na em silip long Coral Sea na pas wantaim Pot Mosbi, Honiara ns Sydney wantaim olgeta hap long Wol. Em wanpela bikpela invesmen long komyunikesen teknoloji bilong Papua Niugini.

Wantaim 20 terabait, dispela nupela kebel i 20,000 taim moa bikpela na gutpela long kamapim gut telekomyunikesen long Papua Niugini.

Praim Minista na Hai Komisina wantaim ol mausman bilong gavman i bin go lukluk raun long dispela kebel stesin long Kilakila Polis Barracks bihain long lonsing.

CS2 invesmen i soim komitmen bilong Australia long sapotim Papua Niugini long kamapim ikonomik infrastraksa we bai helpim divelopmen bilong kantri.

“Australia i serim visen o bikpela driman bilong Papua Niugini long kamapim gutpela ikonomi. Na ba mipela i gohet long sapotim telekomyunikesen, pawa na narapela ol sekta long helpim divelopmen bilong Papua Nignini,” Hai Komisina Philp i tok.

“Mi laik tok tenkyu long ol pipel na gavman bilong Australia long dispela invesmen. Em bai helpim mipela long impruvim bisnis sevis long Papua Niugini. CS2 bai helpim tu long givim gutpela ekses long edukesen na helt sevis,” Praim Minista Marape i tok.

Carolyne Ketsimur i raitim