PLANTI pipel long Papua Niugini i save painim hat long salim ol gaden kaikai bilong ol na seivim mani bilong sapotim famili.

Dispela bikos i no gat gutpela fainensel sevis na prodak na tu ol i no gat gutpela save bilong menesim mani.

Tasol nau ol fama i ken amamas bikos long patnasip bilong Centre for Excellence in Financial Inclusion (CEFI), Fresh Produce Development Agency (FPDA) na gavman bilong Papua Niugini aninit long projek Market for Village Farmers (MVF).

CEFI Ekseketiv Dairekta Saliya Ranasinghe na FPDA Jenerel Menesa Mark Worinu i sainim 5 yia patnasip agrimen bilong CEFI long karimaut fainensel trening, sevis na prodak long 25,000 fama long Westen Hailans , Jiwaka, Simbu,  Isten Hailans long Hailens rijon, Morobe na Is Nu Briten provins.

CEFI wantaim ol trening patna bai skulim ol fama long menesim mani, divelopim komyuniti, na kamapim sampela rot bilong mekim na seivim mani bilong groim bisnis long sapotim ol yet.

“CEFI i kisim ol wokmanmeri pinis na redi long opim opis long Goroka long dispela mun. Mipela bai wok wantaim ol fainensel institusen long divelopim rot bilong helpim ol fama long baim ol prodak bilong ol,” Ranasinghe i tok.

Jenerel Menesa Worinu i tok MVF bai go long wan wan famili na tagetim ol meri na yut long kisim dispela trening.

“Dispela rot bai helpim komyuniti long kamapim gutpela envairomen bilong ol famili. Mipela i bilip bai dispela projek bai kamap gut,” Mista Worinu i tok.

MVF i gat mani olsem $USD38 milien (PGK127 milien) na i stap long han bilong gavman long Dipatmen bilong Egrikalsa na Laipstok (DAL), na bai FPDA i karimaut wok wantaim fanding i kam long IFAD.

Carolyne Ketsimur i raitim