WOK bilong mekim helt sevis long ol hauslain long Henganofi distrik, Isten Hailans bai i ken kamap gut, bihain long lokal MP Robert Atiyafa i givim 5-pela foawil-driv (4-drive) kar long sapotim wok bilong helt senta long ilektoret.

Presentesen seremoni i bin kamap long fran bilong bikpela opis bilong Isten Hailans Provinsal Helt Atoriti (EHPHA) long Mande dispela wik.

Atiyafa i tok, ilektoral opis bilong em i luksave long helt senta long distrik husat i laikim kain helpim long subim wok bilong helt long distrik i go het.

“Opis bilong mi i luksave long dispela hevi bilong ol helt woka husat i save painim hat long i go long ol hauslain long mekim wok na givim helt sevis i go long ol lokal man, meri na pikinini.

Olsem na mipela i baim ol dispela kar na givim i go long sapotim wok bilong ol,” Atiyafa it ok.

Em i tok helt sevis i mas i go long haus dua bilong olgeta lokal hauslain insait long distrik.

“Sapot bilong helt em i no pinis long dispela mak,” Atiyafa i tok.

“Opis bilong mi bai i go het yet long long givim gutpela sapot long helt, olsem na long nau yet olsem Memba na lida bilong distrik, mi givim nau 5-pela kar, na bihain 3-pela moa em bai mi givim.”

Em i tok distrik i gat 3-pela LLG em Fayantina, Kafetina, Dunatina na em i gat moa long 75,000 man, meri na pikinini.

Na namba em bai i go antap yet olsem na kain helpim em bai i go long helpim dispela ol pipel husat bai laikim dispela helpim long ol hauslain long distrik.

Atiyafa i go moa na askim menesmen bilong EHPHA olsem em i laikim wanpela rurel haus sik i mas kamap long Henganofi long sevim ol pipel long dispela distrik.

Sif Ekseketiv Opisa (CEO) bilong EHPHA Dokta Joseph Apa i tok amamas long Atiyafa long kamap olsem na givim sapot long helt sekta long distrik bilong em.

“Mipela i no save lukim planti ol politikal lida i kamap na givim kain sapot long helt sekta long provins.

“Nau mipela i ken lukim stret kala bilong yu olsem lidaman bilong Henganofi long bringim sapot i kam long ol pipel long ilektoret bilong yu.

“Na mipela i amamas na bai mipela i go het long wok wantaim yu olsem patna bilong mipela long bringim helt sevis i go long ol pipel bilong yu na bilong mipela wantaim,” Dokta Apa i tok.