wantok

 

MUNGKAS FC bilong ol meri i redi tasol long bungim ol meri Guria long gren fainal bilong ol meri primia long Pot Mosbi Soka Asosiesen.

Mungkas meri i bin daunim ol Guria meri long kwata fainal sikispela wiken i go pinis long bukim gren fainal spes.
Ol meri Mungkas, i kisim longpela taim long malolo na trening bilong ol i wok long strong olgeta wik long wetim husat tru bai bungim ol.
Ol meri Guria, nau bai go bungim ol meri Mungkas gen long painim husat em kwin bilong PMSA long 2017 bihain long ol winim UNIFC 1-0 long las wiken.
Meri kosa bilong ol Mungkas, i tok, ol meri bilong em i wet longpela taim tru long dispela gren fainal tasol ol i no givap long trening bilong ol. Em i tok tu olsem dro bilong PMSA i save paulim ol. Sampela taim dro bilong ol primia meri save kam aut na sampela taim nogat na dispela i pulim gren fainal i go longpela taim.
Dispela wiken bai lukim ol sapota bilong Mungkas bai pulim lain long traim long bringim tim bilong ol long kisim kwin bilong PMSA.