wantok

 

OK TEDI Divelopmen Faundesen (OTDF) long liklik taim bai gat fektori bilong tanim susu bilong raba diwai i go kamap raba tru.

Ian Middleton, OTDF Sif Ekseketiv Opisa i mekim dispela tok long taim bilong makim graun long Aiambak, Midel Flai Distrik i no longtaim i go pinis.
Middleton i tok faundesen i mekim dispela ol wok aninit long Komyuniti Main Kontinuesen Agrimen (CMCA) plen.
Em i tok tingting bilong faundesen long kamapim dispela fektori i stap insait long Stratejik Daireksen 2016-2020 plen bilong em.
Em i tok bikpela tingting em long lukim ol manmeri i gat mani long poket bilong ol.
Long dispela taim aninit long “Livelihood Development Package (LDP) program, faundesen i wok long helpim ol manmeri long planim raba, rais na igelwud (eaglewood).”
Faundesen i laik yusim dispela program long lukim ol manmeri i sapotim ol yet long nau na long bihain taim taim Ok Tedi Main i pas.
Faundesen i helpim ol manmeri long planim raba long sampela taim i go pinis long Aimbak eria na nau long dispela taim inap long 59 tan raba em ol i salim i go long Singapore na Malaysia.
Middleton i tok taim fektori i kamap, em bai kamapim “Ribbed Smoked Sheet (RSS)” raba we i promotim prodaksen bilong rol sit bilong ol fama moa long raba ol i smukim.
Dispela ol sit ol bai redim, putim long peket na salim i go long fektori.
RSS i gat bikpela velu long intanesenel maket moa long kap lam na kamap bilong dispela i stap klostu long mak bilong mekim ol taia bilong kar.
Middleton i tok Aimbak i stap long ples we ol manmeri long longwe ples insait long Midelflai na Saut Flai i stap long provins i redi long salim raba we i givim gutpela mak na i helpim ol manmeri long kisim gutpela mani.
Em i tok wantaim dispela faundesen bai givim teknikal helpim long ol fama.
Em i laikim tu olsem ol i mas kamapim wanpela rot namel long Aiambak i go long Lek Murray.
“Gol na kopa i no save groa long diwai olsem raba na igelwud. Raba bai stap longpela taim moa long 40 yia,”Middleton i tok.
“Ol manmeri i no ken wet long kompensesen mani o taim main i pinis, ol bai gat mani yet.”