wantok

 

OL Gret 8, 10 na 12 sumatin long kantri i wok long sindaun long mekim nesenel eksaminesen bilong ol.

Long dispela wik inap long 67,500 sumatin long Gred 10 nau i sindaun long fainel eksaminesen bilong ol na bai pinis long tumora.
Dispela ol sumatin i kam long 302 hai skul na sekendri skul long kantri. Long dispela namba, 170 em ol hai skul we ol gred i go inap long Gret 10 tasol.
Ol sumatin i sindaun long 12-pela sabjek.
Edukesen Seketeri Dokta Uke Kombra i tok ol eksaminesen i bikpela samting long ol sumatin bikos ol i helpim long ol arapela intenel eksam ol sumatin i mekim long soim save ol sumatin i gat.
Dispela eksam bai  tokaut sapos ol sumatin inap long skruim skul bilong ol i go long Gret 11 long ol Sekenderi o Nesenel Hai Skul o nogat.
“Ol mak o asesmen i bikpela samting long wanem ol bai tokaut sapos ol bai makim ol sumatin long go long narapela level long skul o kisim wok,” Dokta Kombra i tok.
Em i askim ol papamama, was papamama na ol tisa long givim moa taim na sapot long ol sumatin bai ol i ken sindaun gut long eksam bilong ol.
Tasol Seketeri Kombra i givim bikpela tok save long ol sumatin long no ken hait na kisim ansa.
“Mekimsave bilong hait na kisim ansa em sumatin i no inap long kisim setifiket. Mi askim olgeta ekstenel was tisa, skul na inspekta long tok save hariap long Mesamen Sevis Divisen long givim mekimsave long husat sumatin i mekim olsem,” Dokta Kombra i tok.
Em i askim olgeta lain husat i pas long wok bilong skul eksaminesen long bihainim lo.
Neks wik ol Gret 12 bai sindaun long eksaminesen bilong ol na dispela bai kisim tupela wik.
Bihain long dispela ol Gret 8 bai sindaun long eksaminesen bilong ol.