wantok

 

DEPUTI Dairekta bilong Nesenel Fiseris Atoriti (NFA), Philip Polo i opim nupela komyuta leboreteri na laibreri bilong Nesenel Fiseris Kolis (NFC) long Nu Ailan, i no long taim i go pinis.

“ Kompyuta leb na laibreri em i bilong ol sumatin, tisa na ol arapela lain i kam long wokim stadi long fiseris wok.
“ Em i wanpela bilong ol samting yupela ol wok lain hia i bin lukim na harim long midia longtaim.
“Em samting yupela bai yusim long kisim gutpela skel trening.
Mista Polo i tok olsem fiseris kolis em impoten bisnis han bilong NFA.
“ NFA i kamap long 2000.
“ Insait long ol winmani atoriti kisim long dispela 17 krismas olgeta.
“NFA i laik kamapim moa samting long fiseris kolis bilong helpim ol sumatin, tisa na ol man i kam long stadi long ol nupela rot bilong mekim long fiseris sekta i yusim long kisim save.
“ Nesenel gavman i helpim wantaim K5 milien aninit long Stet Invesmen Program bilong en long wokim dispela nupela trening kompleks laibreri na kompyuta leb i stap long en.
“ Dispela mani em bilong kantri, mipela i yusim long kamapim sampela gutpela samting inap long helpim ol pipel na kantri bilong yumi, Mista Polo i tok.
Aninit long lukaut bilong prinsipal, Jeff Kinch, i gat planti senis i kamap long kolis.
Sampela bilong ol dispela senis em nupela oditorium, maritaim trening senta,laibreri na kompyuta leb.
Ol wok lain bilong kolis i amamas long lidasip bilong Mista Kinch.
Mista Kinch i tok em i no win  bilong wanpela man tasol na em i tok tenkyu long olgeta wok lain husat i wok bung wantaim em long kamapim ol dispela samitng.
Long opim bilong laibreri na kompyuta leb, Mista Polo i tok: “Ol narapela dipatmen o bisnis grup tu i  ken kamap long kolis na mekim agrimen long yusim ol dispela samting.