wantok

 

DISPELA Tambul-Nebilyer School Fee Initiative bai i gohet long givim edukesen long moa populesen bilong Tambul-Nebilyer ilektoret long Westen Hailans na long kantri tu.

Man i statim dispela faundesen na bisnisman, Gabriel Andandi, i tok dispela inisitiv i bin kamap long 1998 yet na bai i gohet bikos edukesen em i impoten tru long divelopmen bilong kantri.
Mista Andandi i tok long wiken, Sarere 7 Oktoba 2017, long taim em i givim moa long K7,000 long baim ol skul fi bilong ol Tambul-Nebilyer studen husat i skul long Divine Word Yunivesiti na Madang Tisa Kolis.
“Mi bin mekim dispela komitmen long helpim ol papamama bilong ol dispela studen na  baim fi bilong ol bikos mi bilip edukesen em i wanpela impoten samting bilong ilektoret na kantri.
“Mi statim dispela program long 1980 samting i kam inap nau, we yumi lukim planti ol pipel bilong Tambul-Nebilyer na Papua Niugini i kisim helpim long en. Mi baim skul fi bilong ol studen husat i stadi long PNG na ovasis olsem long Saina na Filipins na ol arapela kantri,” Mista Andandi i tok.
Presiden bilong ol Tambul-Nebilyer studen long DWU, Steven Wanis, i tok tenkyu long Mista Andandi long makim maus bilong ol arapela studen bilong DWU. Em i tok visen bilong Mista Andandi long lukim populesen i kisim edukesen, em i mak bilong wanpela lida husat i tingting long sindaun bilong ol pipel long bihain taim.
“Mipela i ting yu bin resis long dispela Nesenel Ileksen na yu yusim dispela toktok bilong baim skul fi long long grisim mipela, tasol mipela i amamas olsem yu tok tru.
“Mi yet i kisim helpim long dispela asistens yu givim long taim mi kam skul long DWU na mi mas tok tenkyu long yu long nem bilong papamama bilong mi,” Mista Wanis i tok.
Presiden bilong ol Tambul-Nebilyer studen, Ismael John, i tok em i amamas long lukim Mista Andandi i gohet yet long dispela Tambul-Nebilyer School Fee Initiative, em i bin tokaut long en long las yia.
“Dispela program bilong Mista Andandi bilong baim skul fi i bin stat long 1997. Planti i ting em i bin yusim dispela skul fi helpim long grisim ol pipel long votim em long taim bilong ileksen, tasol mipela i amamas olsem em bai gohet long dispela program nau na i go moa yet,” Mista John i tok.
Mista John i wanpela bilong ol lain i bin kisim helpim long foapela yia em i skul long Madang Tisa Koles. Bai em i greduet long pinis bilong dispela yia na em i tok dispela skul fi helpim bilong Mista Andandi i helpim em na bai em i greduet nau na apim nem bilong Tambul-Nebilyer.
Mista Andandi i promis long go long ol arapela yuivesiti na kolis long dispela yia long baim ol skul fi long ol studen bilong Tambul-Nebilyer na bai ol i ken go malolo long Krismas na i no gat dinau.
“Bai mi go long ol dispela skul na kolis long PNG stat long neks yia na baim skul fi bilong ol studen bilong Tambul-Nebilyer na ol i ken greduet wantaim gutpela mak,” Mista Andandi i tok.