wantok

 

LONG Epril 21, 2017, Pasto Giesa Panpan, saplen bilong Wasu Sekendari Skul long Tewai-Siassi Distrik, Morobe Provins, i  bin  greduet long Papua Niugini Yunivesiti ov Teknoloji (Unitech) wantaim Masta ov Ats long Oganaisesinal Lidasip (MOAL).

Pasto Panpan i marit na i gat 6-pela pikinini. Em i kam long Sikam ples long Komba eria bilong Kabum Distrik.
Dispela em tripela yia long em i wok pasto bihain long em i greduet wantaim Diploma long Teoloji long Martin Luther Seminari long 2014.
Pastaim Panpan i bin wok tisa long Balob Tisa Koles inap long 22 krismas.
Bihain em i risain long wok tisa na i go skul long Martin Luther Seminari. 
Nau em i mekim wok pasto long as distrik bilong em insait long Kabwum, Morobe Provins.
"Mi amamas long kisim dispela save MAOL, long wanem em i sut long wok bilong mi long pasto,” Panpan i tok.
“Wanpela Kristen Oganisesen long Wol ol i kolim, Divelopmen Asosiet Intanesenel (DAI) i kamapim dispela kos na i save givim i go long planti manmeri insait long 159 yunivesiti long wol.”
Dispela kos em i kamap namba wan taim insait long Unitech, na em i wanpela long ol 5-pela sumatin i pinisim kos na  greduet.
Dispela kos i sut long Kristen lidasip, na i givim gutpela save long  helpim arapela manmeri long mekim gutpela wok long kain kain oganaisesen, long rot bilong  plenim gut wok (strategic planning), na helpim ol arapela long wok long tim (empowering team work).
Panpan i tok kos i kamap long rot bilong ‘flexible Mode of study ’ na  em i kisim kos  long 2013 na pinisim long 2016.
Panpan i tok kos i helpim em gut long mekim planti arapela wok olsem:
Raitim ol prosek proposal;

  • Skul lening improvemen plen (SLIP);  na
  • Ranim ol woksop, raitim ol kos insait long Luteran Sios na ol arapela NGO wok.

"Mi tenkyu long God long wanem, em i helpim mi long pinisim namba tu Masta Digri bilong mi bihain long mi kisim Masta Digri long Edukesen long Charles Sturt Yunivesiti, Australia long  2011,” Panpan i tok.
“Dispela save i helpim mi long mekim gut wok insait long sios.
“Mi bilip, God bai helpim mi long yusim dispela save long laik bilong em yet insait long sios na long komuniti wantaim long helpim ol manmeri.”