wantok

 

NESENEL Fiseris Atoriti (NFA) i lukluk long wok bung wantaim ol narapela dipatmen bilong gavman long mekim wok na bringim sevis na divelopmen i go long ol pipel na kantri wantaim.

Deputi Dairekta bilong NFA, Philip Polo, i mekim dispela tok long greduesen de bilong ol sumatin long fiseris kolis long Nu Ailan, las wik.
“Mipela i mas givim moa helpim i go long ol skul, haus sik, polis na difens, kastom na Nakia (NAQIA).
“ Mipela mas strongim wok bung namel long olgeta diaptmen wok aninit long gavman bai mipela inap long gat gutpela tingting long wanpela na narapela na mekim ol wok bilong mipela gut long helpim kantri bilong mipela.
“ I no wok wan wan olsem long kisim tingting long NFA tasol, mipela mas kisim tingting bilong olgeta diaptmen, na i gat gutpela bel na mekim wok gut.
“Pipel i mas kisim trening long helpim ol long mekim wok bilong ol,” Mista Polo i tok.
Fiseris Kolis i save givim ol program i gat gut skel trening long ol fiseris wokman na meri.
Long nau, kolis i givim tu ol narapela trening program bilong komesel wok ( lukautim pis long salim) olsem;
-post haus operesen
-fiseris bisnis
-akuakalsa
-fiseris gavanens ( save fama i mas gat long lukautim pis).
Ol opisa husat i kisim pepa las wik, em ol namba wan grup  long kisim dispela kain trening.
NFC Prinsipal, Jeff Kinch i tokim ol opisa long mekim wok taim ol i go bek long wan wan opis bilong ol long ol provins ol i kam long en.
“ Yu no ken i go na putim pepa bilong yu long sait long ol narpela pepa yu bin kisim longtaim,” em i tok.
Man makim maus bilong ol fiseris opisa husat i kisim pepa las wik, Joel Kivung bilong Kandrian- Glosta Fiseris long Wes Nu Briten i tok olsem sampela taim i save hat liklik long ol opisa i mekim wok gut long provins.
“ Sampela taim i save hat tumas long mipela mekim wok bikos gavman bilong provins i no save givim gutpela helpim long fiseris wok.
“ Mi laik askim NFA olsem no ken lusim tingting long mipela.
“ Tingim mipela long wanem rot yu inap bai mipela ken surikim wok na awenes i go long ol komyuniti long wan wan provins mipela kam long en,” Mista Kivung i tok.