wantok

 

DIPATMEN bilong Tred, Komas na Indastri long las wik i givim K900,000 long Benk Saut Pasifik (BSP) long sapotim wok bilong Smol i go long namel bisnis (SME) program long mekim wok.

Dipatmen i givim mani aninit long SME Ekses program ol i kolim Dinau Orijinesen Sistem, Lendfast.
Long taim bilong kisim mani BSP Grup Sif Ekseketiv Opisa Robin Fleming i tok: “Gutpela kamap bilong dispela sistem i bungim mak bilong Wol Benk Pefomens Bes Gren em tok orait BSP i sainim long 2013.
“Dispela tok orait i bilong divelopim na givim ol prodak we i gutpela long ol SMEs long PNG em benk i mekim pinis.”
Long taim bilong givim sek man long BSP, Minista bilong Tred, Komas na Indastri, Wera Mori, i tok: “Dispela i givim strong long mi long wok wantaim tim bilong yu, moa long ol opisa long Smat Bisnis Yunit bilong SME.
“Ol i save wok hat long lukim olsem ol dinau mani i kam long sistem i go aut gut na karimaut ol projek.
“Long las faiv yia, PNG SME Akses i go long Fainens Projek aninit long Dipatmen bilong mi i poroman gut wantaim Wol Benk na ol stekholda na strongim ol provinsal komas divisen insait long kantri.
“Em i trenim 36 bisnis divelopmen opisa long 22 provins, trenim 774 SMEs projek na givim teknikal sapot long BSP long divelopim na soim PNG long namba wan taim long namba wan SME Smat Bisnis Lons.”
Minista Mori i tok amamas long Wol Benk, Intanesenel Fainens Koporesen, Dipatmen bilong Tresari na Nesenel Plening long givim sapot bilong ol long PNG SME.
“Tude (Fonde 5 Oktoba) mipela i givim luksave na witnesim wanpela moa bikpela samting em BSP i mekim long karimaut dinau mani long dispela program,” Stanerd Wai, SME Menesa i tok.
“Wantaim gutpela kamap bilong Lendfast Sistem, olgeta BSP brens long PNG inap long helpim long givim dispela SME dinau mani.
“BSP i givim mani moa long K500 milien aninit long SME Dinau program we K79 milien i kam long Lendfast Sistem.”