wantok

 

GAVMAN bai bihainim tok promis komitmen bilong em na baim ol wod kaunsil, Praim Minista Peter O’Neill i tok.

Em i tok ol wod kaunsila i stap long wanpela level bilong gavman i wankain long distrik, provins na nesenel level.
Em i mekim dispela tok bihain long Memba bilong Nuku, Joe Sungi, i askim sapos gavman bai baim ol kaunsil olsem praim minista yet i bin tok long en long stat bilong yia.
Sungi i tok i gat olsem 6000 wod long kantri na gavman i tok long givim K64 milien long baim ol kaunsil na stretim hap bilong wan wan ol wod.
“Yes mipela bai mekim tasol dispela bai kamap bihain long 2018 LLG Ileksen,” O’Neill i tok.
“Memba i mas save olsem mipela i pinis tasol long 2017 Jeneral Ileksen na mipela bai redim mani long ranim ol LLG Ileksen long 2018.
“Bihain long LLG Ileksen mipela bai lukluk long dispela.
“Mipela bai givim mani gen long ol wod aninit long wod sevis impruvmen program (WSIP).”
Tasol em i tok planti ol memba i save givim mani long ol kaunsil aninit long distrik sevis impruvmen program (DSIP).
“Sampela bilong mipela i wok long givim mani aninit long DSIP bilong mipela,” O’Neill i tok.
“Mi tok tenkyu long ol memba long dispela.
“Dispela i soim mipela i gat komitmen long mekim.”
O’Neill i tok taim kain sapot i stap, dispela i lukim wan wan level bilong gavman i wok bung gut wantaim wanpela na narapela.
Em tok gavman i mas givim sevis em ol pipel i laikim.